Katherine Palacio ta konta nos Di kaminda skur pa klaridat di bendishon

1122

Katherine Palacio a nase na Colombia, pero a biba 19 aña na Kòrsou. Su yunan a nase i krese na Kòrsou i kriá komo un bon yu di Kòrsou. Dado momentu nan a muda pa Ulanda. Su eksperensia na Kòrsou i despues a bai Ulanda el a hinka den e buki Restaurada ku e ke pa sirbi komo un guia, un estímulo pa mas muhé ku por ta pasa den mesun kos ku el a pasa aden. E buki aki, su promé buki por sierto  e tempu ku e tabata biba na Kòrsou ainda, ora ku e tabata pasando den e proseso su divorsio, pero ta awor numa e buki a wòrdu publiká na Honor i Gloria di Dios, e motibu di esaki ta den e temporada ku El a permití pa Katherine a pasa den tantu kos, preparando su bida pa asina awe ei por ta un ehèmpel di su Gloria.

 

E promé

Katherine a konta Djasabra ku esaki ta su promé buki. E buki a keda skibí na Kòrsou i tur loke tin den e buki a pasa na Kòrsou. Segun el a konta nos, na momentu di separashon ku su kasá, el a kai den un frustrashon i tristesa hopi grandi. El a kuminsá papia ku hende i konfia hende pero a keda defroudá dor di hende. I un dia e ta kòrda el a yega kas asina tristu i a mira e kòmpiuter den kamber di su yunan i el a kuminsá skibi pa asina niun hende defroud’é mas. Asina el a kuminsá skibi, manera un diario. E tabata skibi tur anochi, kada bes ku e tabata tristu i asina e buki a nase sin el a plani’é. Esakinan a sosodé na 2016 segun Katherine.

No tabata fásil

Na 2021 e buki a sali na luna di desèmber. No tabata fásil pa e publiká. El a purba promé bia na Kòrsou pero a pèrdè su sèn. Na  Ulanda tambe el a purba, traha duru spar sèn i bai pa su soño ku ta publiká e buki. Awor e buki ta riba merkado. E ta na spañó i pronto e lo sali tambe na ingles. Katherine ta trahando un otro buki na papiamentu i kisas lo pone Restaurada den dje.

 

Komprondé

Restaurada ta un buki tristu. E ta konta Katherine su historia kon el a pèrdè su kasá i divorsio. E ta konta ku el a pèrdè speransa, kon e tristesa a bin su bida i a bash’é abou. Tambe e lo laga komprondé kon Dios por lanta bu for di suela. I un dia el a kansa di yora, kansa di ta frustrá, kansa di mira ku nan mama kasi no tabat’ei i esei a pone ku e mester a buska Dios pasobra e mes no tabatin forsa. El a kai hopi profundo den kaminda sukú i shushi pero Dios a skap’é i poné riba bon kaminda. El a divorsiá si, pero Dios a dun’é un kaminda di speransa, bida i gosa i esei ta plamá den e buki Restaurada.

 

Kaminda di bruheria

Katherine a konta ku el a kai den bruheria. El a kai den e mundu sukú ei. Esun ku ta lesa e buki lo drenta e mundu i sa kiko e por spera di e mundu ei. Ta un mundu shushi, kontaminá i ta pone un distansia di hòmber i Dios. Ta bon pa lesa e buki i komprondé pa no kai den e kaminda ei.

 

Bèrgwensa

“Mi a  hasi hopi kos den tempu pasá, tabata bèrgwensa pa mi pero awor mi tin e balor pa bisa tur hende muhé pa nan no hasié. Mi a deskuidá mi mes. Mi a bira hopi mahos. Mi tabata bai trabou i tur mi koleganan tabata puntra mi kiko tabata pasa mi, kiko tabata pasa mi kabei, mi tabata mustra malu. Nan tabata manda mi bai dòkter pero mi no kier a keda kas. Mi kas tabata manera un fièrnu. E tempu ei mi a lubidá mi yunan. Nan tabat’ei si pero mi kabes tabata den otro mundu buskando manera di haña mi kasá bèk buskando manera pa mi dal e mucha muhé”, Katherine a konta Djasabra.

 

Buska Dios promé e kos malu bin

Loke Katherine a pasa aden, tin hopi hende muhé mas ta pasando den dje, asta awendia. Loke Katherine ke bisa nan ta ku Dios por tur kos. Ku Dios bo ta haña speransa, haña  pas mei mei di e situashon difísil ku bo ta pasa. No solamente den e separashon ku kasá pero den momentu ku muchanan kuminsá bira grandi i nan ke kaya, komo mama bo ta kuminsá preokupá pero Dios ta hasi bu sabí. I p’esei mester bai promé kos malu bin. Tin hende ta buska Dios ora kos malu pasa manera el a hasi. El a buska Dios ora el a pèrdè tur kos. Pero si bo tin chèns di buska Dios ora kos a bai bon, bo ta haña grasia. No warda kosnan bai den profundidat, no warda kosnan basha abou pa buska Dios. Dios ta disponibel tur momentu. E no tin un lugá presis pa hañ’é i p’esei buska for di awe, segun Katherine a bisa. Den su kaso el a haña Dios i ya tur hende por a mira un kambio den dje.

 

Kambio

El a ripará ku kos tabata robes. E tabata yega kas atardi for di trabou i ta mira su yunan bashí i sin atenshon di dje. E no tabatin mas sèn pasobra tur a bai na bruheria. E no tabatin tempu pa hasi kosnan kontentu ku su yunan. I el a sinta den su kas i keda pensa i yora i a bin na e desishon ku e no por sigui e bida aki. Su kasá tabata kontentu ku su bida pero serka dje kada dia tabata unu ménos. E mes tabata papia ku su mes i ku ta kèns el a bira. Semper tabata den su mente ku e no por i esei ta un palabra ku mester kita pasobra nos por tur kos den nòmber di Jesus. E dia el a kuminsá  pone kantikanan, tende orashon, purba papia ku Dios i el a bai riba su rudia i buska Dios ku su kurason i el a hañ’é.

Den divorsio ta tur dos tin falta

Ora hende divorsiá no ta bai di un banda so pero tur dos banda. E tempu aya e tabata tira e falta riba e hòmber pero e bèrdat ta ku ora di divorsio ta dos hende. Ta nan tur dos a hasi fout, nan dos a lubidá Dios i kana nan mes kaminda. El a deskuidá su kasá pasobra el a haña yu ohochi. E tabata semper kansá, trabou i e muchanan pero esei no tabata motibu pa laga su kasá un banda pero el a hasié. E ta kòrda ku su kasá kier a sali kuné pero e tabata mand’é bai su so. E mes a pusha su kasá for di dje. Despues a kuminsá ku bringamentu na kas, sèn sèn i sèn tur kos tabata. Ora kasá bin kas e ta spera di haña su famia, pas, e ke sinta tramkil. Bo kas ta e lugá di skonde di famia. Bo tin di haña pas na kas. Pero Katherine no tabata den esei, semper e ta buska manera pa diskutí i skonde di su kasá. Esei a trese pa e hòmber buska otro hende.

 

Hasi algu diferente tur dia

Ora divorsio yega, e muchanan ta sufri, tur dos banda ta sufri, Un divorsio no ta un kaminda di solushon pero p’esei mester traha tur dia riba e relashon. Si bo tin bo kasá buska moda tur dia di hasi algu diferente i ta kla pa tende i papia ku amor i asina bosnan dos huntu ta sigui kana bai dilanti. Un bon kasá ta un manera di glorifiká e nòmber di Dios. Na kuminsamentu e hòmber tabata bon kasá i yuda ku e muchanan pero ora el a kuminsá bai kaya, yega lat, bebe alkohòl, el a lubidá su famia i tur e karga a keda pa Katherine so. Nan tabata yuda otro pero despues e kos a keda pa e so. I te awe e yuna ta bou di Katherine so.

 

Divorsiá pero no di e yunan

El a bisa ora bo divorsiá bo ta hasié di bo pareha pero no di e muchanan. E muchanan ta sufri bastante ku e separashon di nan mama i tata kaba. Mester keda e bon komunikashon pa e muchanan sinti por lo ménos ku nan mama i tata ta presente den nan bida. E mama i tata no ta biba mas manera hòmber i muhé pero mester tei pa e muchanan. Esei ta un manera pa yuda e muchanan bai dilanti sin ku nan ta sufri ku nan mama i tata a divorsio. Katherine ta pidi tur hende hòmber pa paga tinu riba bo yunan, disfrutá di kada etapa di e muchanan pasobra e ta pasa hopi lihé.

 

No mas fout den bida

I Katherine a bai Ulanda. El a tuma e desishon ei pasobra el a sintié frustra na Kòrsou. E tabata keda wak su pareha ku su frei nobo i Katherine a ripará ku e no ta bai dilanti. El a sinti ku su tempu na Kòrsou a yega na su fin. El a lucha pa e keda pasobra ta 3 aña despues ku el a divorsiá el a bai Ulanda. El a sinti ku e mester bai dilanti i e tin un Dios i ounke e no tin kasá.  Kisas hende lo pensa ku ta un eskape pero el a sinti ku e no por sigui hasi mas fout den su bida. Awor e ta sintié un muhé kompleto i bendishoná.

 

Restaurada ta riba merkado

Restaurada ta pa tur hende muhé ku ta kasá, tur hende muhé ku ta den un relashon, tur hende muhé ku ta pensa di bai kasa. Ta un buki bunita ku ta hiba bu sera konosí ku Dios di aserka i e ta yuda pa bo ta un muhé virtuoso manera beibel ta siña. I loke Katherine a pasa aden e no ke pa otro muhé pasa den dje, esta kai den frustrashon pasobra un hòmber ta bai fo’i kas. No yora pa hòmber i pone tur lágrima den presensia di Dios. E  buki ta na Kòrsou pero tambe por kumpr’é ‘online’ riba Katherine su wèpsait i riba Amazon tambe por kumpr’é. I si hende ke lesa e buki i no tin medio, por duna tur kontakto ku Katherine pasobra e buki no ta pa traha sèn pero pa yuda otronan.

 

Restaurada, a tuma serka di 10 luna pa Katherine a skibié.

E historia kompletu kon ora e separashon a yega, kon mi a drenta den kamindanan skur, pero tambe e lektor por disfrutá kon Dios a lanta mi pa awe mi por ta Restaurada!

 

Facebook: Katherine Palacio

Wèpsait: https://katypala.com

LAGA UN KOMENTARIO

Please enter your comment!
Please enter your name here