WASHINGTON.- Kamala Harris finalmente a skohe Tim Walz komo su partner den e kontienda pa elekshon. E eskoho di Harris den sierto sírkulonan a bini di sorpresa, i otronan ta di akuerdo kuné. Kamala mes a duna di konosé ku e ta orguyoso di por a skohe Walz komo su partner di kampaña pa bira vise presidente di Merka. Walz ta un gobernador di Minnesota ku hopi bon kredensial, un hòmber di pueblo ku no tin muchu kontroversia rondó di su persona.
Walz tabata riba e lista di personanan pa vise presidente huntu ku otro polítikonan Demókrata pa asina amplia e eskoho ku Harris tabatin pa e bai den e kontienda kontra Donald Trump. Ku e meta tambe pa hasi historia na Merka komo e promé presidente hende muhé i di koló, i e no tin muchu tempu pa e por kore kampaña, ya ku dia 5 di novèmber ya ta elekshon.
Komo un gobernador, un coach, maestro i veterano, el a hiba su bida pa famianan manera esun di dje mes, i segun Kamala e ta kontentu di tin Walz den e tim. Kon ku bai bini, e espektativanan semper tabata ku Kamala lo bai skohe un hòmber blanku pa asina trese balanse den e votonan i asina yuda gana e grupo di klase trahadó blanku, votadónan maskulino, ku ta un demográfiko ku a yuda Trump pa gana elekshon na 2016. I Walz ta kuadra ku e deskripshon ei na su edat di 60 aña, i e tin eksperensia amplio komo militar i ku ta tweet tur ora riba yagmentu. Di su parti presidente Joe Biden a konsiderá e eskoho aki komo unu ekselente.
