WASHINGTON (AFP).- E republikano Donald Trump a reanudá su kampaña ayera akusando Kámala Harris di ta promové violensia kontra di su persona, esei na momento ku e kandidato demokrat di White House ta parse di a kue un bentaha leve den enkuestanan.
Harris a yama e eks-presidente “pa papia di forma direkto kuné i manifestá di ta kontentu p’e echo ku e ta oké”, segun un funshonario haltu di White House. “E kombersashon tabata kordial i kòrtiku”, segun el a agregá.
“M’a bis’é e loke m’a publiká: No tin lugá pa violensia polítiko den nos pais”, segun Harris a bisa ayera den un entrevista.
Trump, di 78 aña, ta bisa ku e sospechoso detené djadumingu na Florida pa un supuesto intento di asesinato kontra di su persona, “a kere e retórika” di presidente Biden i di Kámala Harris “i a base di esei a aktua”.
Segun Trump, ta “debí na e retorika di iskierda komunista, ku balanan a skeiru i ku e situashon lo bira pió”.
Dinamika na fabor di Harris
Trump i Harris ta rekoré seis pa shete estado klave e dianan aki, na momento ku e demokrat di 59 aña tin un bentaha leve den enkuestanan for di despues dje debate di 10 di sèptèmber.
“Si nos mira e enkuestanan hasí despues dje debate i esnan promé, e dinámika ta bon kla a fabor di Harris”, segun un spesialista dje side Five Thirty Eight, ku ta analisá vários enkuesta.
Segun e mesun wèpsait, pa promé biaha for di yüli di 2021 ku Harris ta haña tantu opinion faborabel komo desfavorabel (46.6%), miéntras ku te resien esnan negativo tabata dominá.
