PHILADELPHIA, USA.- Kandidato presidensial Kamala Harris ayera a yega Philadelphia, kaminda awe lo e enfrentá Donald Trump den un debate hopi sperá ku bista riba elekshonnan presidensial di novèmber. Nan ta topa otro na momento ku enkuestanan ta mustra ku nan ta hopi pareu serka votadornan.
E eks-presidente Donald Trump lo mester yega e siudat awe den oranan lat di atardi, djis algu promé ku e debate organisá pa e kadena ABC.
Den un entrevista grabá siman pasá, Kamala Harris a antisipá ku su rival lo usa “su resetanan bieu” pasobra “e no tin límite den e forma baho ku e por bai”.
“Nos mester ta prepará pa motibu ku sigur lo e bai gaña masha hopi. “Lo e lucha pa su mes interesnan, no pa interes di norteamerikanonan”.
Promé ku e debate e demokratnan a saka un video nobo den kua ta rekopilá krítikanan di eks-funshonarionan haltu dje gobièrnu di Trump, inkluso di e vise presidente Mike Pen, pa deskribí e mionario di 78 aña komo “un peliger” pa e pais.
E eks-presidente republikano a hasi vários aparishon públiko, miéntras ku su rival a pasa mayor parti di último tres dianan será na Pittsburgh ku su ekipo i solamente a sali pa dal un keiru huntu ku su kasá Doug Emhof òf pa bai hasi kompra.
Un tienda anti-Trump a bisa ayera ku e kandidato republikano riba su plataforma Truth Social a bolbe kalifiká Harris di ta un marksista.
Riba e mesun ret, Donald Trump djasabra a atvertí ku si e regresá White House lo e imponé “kastigu di prizòn pisá” pa kualke hende ku, na su opinion, plania pa “hasi trampa” den novèmber.
Djadumingu, Trump sin prueba a akusá Joe Biden di a “hòrta” e viktoria kuater aña pasá. Riba Truth Social el a skirbi “nos lo gana Pennsylvania ku márgen grandi, a ménos si e demokratnan no hasi trampa”.
Trump den 2016 a gana e estado ei ku márgen chikitu, miéntras ku den 2020 e viktoria a bai pa Biden, tambe ku masha poko diferensia.
E republikano, prosesá pa a purba kambia resultadonan den e último elekshonnan, no a komprometé su mes na rekonosé su derota den kaso ku e pèrdè e elekshon.
Enkuestanan
Un enkuesta públiko di ABC ayera a duna Kamala Harris un 50% di intenshon di voto kontra di 46% di Trump serka e merikanonan registrá riba listanan elektoral, i un 52% kontra 46% entre votadónan ku tin intenshon di bai urna.
Un enkuesta publiká djadumingu pa New York Times a duna e eks-presidente un bentaha di un punto riba e visepresidente (48% pa 47%).
