WASHINGTON, USA (AFP).- Kamala Harris ayera a alertá latinonan di e “deportashon masivo” primintí pa Donald Trump, sostené pa un enkuesta faborabel den tres estado klave pa elekshonnan di novèmber.
“Miéntras ku nos ta lucha pa hiba nos nashon pa un futuro mas luminoso, Donald Trump i su aliadonan ekstremista ta sigui purba pa manda nos atras”, segun el a bisa den un konferensia di Instituto Caucus Hispano na Washington.
“Nos tur ta kòrda e loke nan a hasi pa separá famianan”, segun e visepresidente i kandidata demokrat pa elekshonnan di 5 di novèmber. El a dirigí su mes na un oudiensia entusiasmá ku kada bes tabata interumpié ku aplousonan.
Bou dje polítiko di “sero toleransia” apliká pa Trump di 2018 pa yanüari di 2021, míles di mucha a keda separá di nan famianan pa kibra e deseo masivo di migrantenan ku tabata yega Merka for di rònt Sentro Amérika. Hopi di nan despues a keda reuní tòg i otronan a logra esei durante e gobièrnu di e demokrat Joe Biden.
“Awor el a primintí pa realisá deportashonnan mas grandi, un deportashon masivo den historia norteamerikano”, segun Kamala Harris a atvertí.
“Razianan masivo?”, “kamponan di detenshon masivo?” Ta di kiko e ta papia?”, Harris a puntra. Pareu ku esei el a defendé un enfoke kontrario: Krea un kaminda pa topa ku siudadano, pa miónes di migrante i garantisá e seguridat den frontera ku Mexico. “Nos por hasi tur dos i ta esei nos tin ku hasi”, segun el a agregá.
Mas aleu Harris a primintí di bringa e subida di preis di empresanan grandi, faboresé e akseso pa yega na kas, por ehèmpel ku yudansa di promé atkisishon, i amplia e krédito fiskal pa yu.
Mas aleu el a toka e punto di derechi di aborto, un di e puntonan kayente di kampaña. El a trese dilanti ku 40% di latinonan di Merka ta biba den un estado ku restrikshon òf prohibishon di aborto i ku e “komo presidente femenino” lo firma “ku orguyo” un lei pa restourá e libertatnan reproduktivo.
