WASHINGTON, AP.- E presidente di Kámara di representante, Nancy Pelosi a anunsiá djaweps ku kámara lo prosedé i redaktá kargonan pa un huisio polítiko kontra presidente Donald Trump.
“Loke ta na liña na nos demokrasia”, asina Pelosi a bisa. “E presidente no ta dunando nos otro opshon”.
Pelosi a realisá e anunsio históriko na momentu ku e demókratanan a kuminsá pone preshon pa un votamentu promé ku Pasku.
Pelosi a bisa ku e ta outorisá pa redaktá e akta di e akusashon “ku tristesa pero ku konfiansa i humildat”.
“E akshonnan di e presidente a violá Konstitushon gravemente”, asina el a bisa. “Atrobe e ta purbando di korumpí elekshon na su propio benefisio. E presidente a kometé abusu di poder, loke ta afektá nos seguridat nashonal i pone integridat di nos elekshon na riesgo”.
E investigashon ta relashoná ku un kombersashon telefóniko kaminda Trump a preshoná e presidente di Ukrania pa investigá e demókratanan i su rival polítiko Joe Biden.
E republikanonan ta dominá Senado, kaminda mester di e mínimo di dos terser parti di voto pa retirá e presidente.
E sekretaria di prensa, Stephanie Grisham a tweet ku Pelosi i e demókratanan “mester tin bèrgwensa”.
E republikanonan ta respaldá Trump firmemente i ta ninga di rekonosé ku su akshonnan tabata ilegal i un huisio polítiko den su kontra.
