WASHINGTON, AP.- Kámara di Representante a presentá un informe ku pruebanan inkriminante kontra Donald Trump den e asuntu di Ukrania. Esaki lo start un debate den Kongreso pa determiná si e di 45 presidente di Merka lo haña retiro.
Demókratanan di Komishon di Inteligensia ta argumentá ku Trump a violá su huramento i opstruí e proseso ku su kondukta.
E republikanonan a reakshoná bisando ku Trump no tabatin intenshon di pone preshon riba Ukrania pidiendo esaki un fabor. E presidente a pidi pa investigá e eks visepresidente Joe Biden i algun demókrata mas.
E konklushonnan lo sirbi komo base pa Komishon Hudisial evaluá e posibel akusashonnan, den un prueba históriko den un kaso ku ta dividí Poder Legislativo den e pais kompleto.
