Dr Francis De Lanoy ta haña ku
Despues di sirbi komo Rèktòr Magnificus pa 13 aña, Francis De Lanoy ta renunsiá di su puesto na UoC. Nos no ke laga e bai promé ku nos papia kuné tokante di su eksperensia durante e tempu aki. E ta baha pero lo no disparsé for di pantaya. E lo keda pa duna un man i sigur e lo bai hasi algu ku e gusta i esei ta muzik.
Di UNA pa UoC
Segun sr. De Lanoy, su trayekto na UoC a kuminsá den 2009 komo un sientífiko haltu na e Fakultat Sosial Ekonómiko. Esei tabata despues di e turbulensia di 2008 na e tempu ei UNA. Konfiansa di e studiantenan den e skol a disminuí durante e tempu ei. “Mi a tuma e desishon komo mi yu tabata inskribí akinan. A base di mi yu, mi a proponé pa mi bai yuda edifiká e universidat pa benefisiá studiantenan ku konsientemente a skohe pa kontinuá nan edukashon na Kòrsou”. Den e temporada ei hopi hende a kita for di UNA, entre e rèktòrnan. Tabata evidente ku nan a selektá un rèktòr temporal durante e periodo ei. Apesar ku sr. De Lanoy tabata tei pa un temporada kòrtiku, e fakultat a pidié pa tuma e kargo di dekano, komo (defuntu) sr. Maduro a skohe pa renunsiá. Na 2010 el a tuma e enkargo di dekano di e Fakultat di Sosial Ekonómiko.
Trankilidat, transparensia i inklushon
Pa e rèktòr, e desaroyo mas importante i logro den su 13 aña na UoC ta trankilidat, transparensia i inklushon ta e logronan mas grandi ku e por menshoná den su 13 aña na UoC. Universidatnan tur be ta wòrdu mirá komo pedestal, un símbolo di status. Hopi hende tabata mira rèktòr komo un Dios, pero el a bisa ku su meta ta pa sirbi e komunidat i e studiantenan. Ora el a yega, el a ripará ku tabata pone mas énfasis riba enseñansa i ménos riba investigashon. El a bisa, “No, nos mester transformá e universidat pa bira un instituto di enseñansa i investigashon, spesialmente investigashon apliká. Tur kos ku bo ta hasi i investigá mester tin un balor agregá na e desaroyo sostenibel di Kòrsou”. Asina UoC a bin inkorporá e konsepto di Small Island Developing States, den e programanan di investigashon, i poko poko e instituto a kuminsá adoptá esaki. Tur hende a realisá e importansia di investigashon”. Ku inklushon, sr. De Lanoy a splika ku un mucha no mester ta limitá pa bira un mèslá simplemente pasó su tata ta un karpinté. E tambe tin e derecho pa sigui su meta profeshonal di bira un diseñadó, abogado, akountant òf loke e hóben ta deseá di bira. Hasi e universidat aksesibel pa tur hende, lèsnan públiko pa sigurá ku tur hende ta rekonosé e universidat komo un parti di e pais, ta un di e logronan ku UoC a logra.
Kalidat
Riba e tereno di enseñansa, nan programanan awor tin un seyo di kalidat. Mayoria programa ta akreditá òf positivamente evaluá. Pa UoC, esaki ta un logro signifikante. Un di e kosnan mas importante komo Vise-Presidente di Universidatnan di Karibe for di 2018, ta segun sr. De Lanoy ku a elevá e Universidat di Kòrsou na un plano basta haltu den Karibe. Den Karibe, UoC ta mirá komo un partner hopi serio.
Studiantenan internashonal
UoC tambe ta ofresé posibilidat pa hóbennan internashonal studia na UOC. Sr. De Lanoy a bisa ku na 2014 nan a uni ku Erasmus Charter. Esei ta nifiká ku nan studiantenan por sigui parti di nan estudio, manera un minor òf stazje, na paisnan Oropeo. I miéntras e studiantenan di e paisnan Oropeo tambe tin e posibilidat pa bini Kòrsou. UoC ta risibí studiantenan for di 16 diferente pais manera China, Saudi Arabia, Colombia, Venezuela i otro paisnan. Komo Vise-Presidente tambe di “Strategic Alliance”, sr. De Lanoy a menshoná ku el a logra introdusí ‘Koninkrijksbeurs’. E beka aki ta brinda e studiantenan e oportunidat pa bai paisnan den Reino manera Aruba, Sint Maarten i Hulanda. Asina ta interkambiá, henter e mobilisashon ta un eksperensia tremendo.
Mas posibilidat
I UoC ta ofresé mas oportunidat pa studiante. Ounke segun Rèktòr Magnificus e numbernan a baha un tiki pa motibunan demokrátiko. UoC a kuminsá priorisá tres faktor: programa internashonal, kalidat i echo ku studiantenan por biba na universidat. Por ehèmpel, awor aki (dia di e entrevista aki) un grupo di studiante di “Human Resource” tabata na Chicago pa e konferensia di “Society of Human Resource Management”. E konferensia aki ta unu hopi importante pa tur profeshonal riba e tereno aki. Ku e akreditashon di e programa di “Human Resource” e studiantenan ta risibí su sertifikashon.
E studiantenan di “Toegepaste Psychologie” a kaba di regresá for di Santo Domingo. “Mi strategia ta basá riba forma aliansa ku otro institutonan akadémiko a base di igualdat. UoC tin algu di ofresé pero e otro instituto tambe ta ofresé algu, segun De Lanoy.
Campus bou di konstrukshon
E Campus di UoC por akapará 100 studiante. Aktualmente e ta wòrdu ménos usá komo ku e ta bou di konstrukshon.E Campus aki a keda konstruí for di 1979. Hopi studiante ke para un tiki riba nan mes. Un temporada e campus tabata kompletamente yen ku UoC mester a hür otro lugá aserka. Awor aki otro institutonan a mustra interes ku nan ke hasi uso di e fasilidat di campus di UoC. Esei ta brinda nan e oportunidat pa sigui desaroy’é.
Enseñansa ta un invershon i no gastu
Sr. De Lanoy a sigui bisa ku ora bo tin un instituto di investigashon i enseñansa haltu, tur loke bo hasi den dje mester wòrdu mirá komo invershon den kapasidat humano. Anto esei el a ripará ku ainda ta mira enseñansa komo un gastu. E transferensia di pensamentu di enseñansa komo gastu pa invershon humano, ta su deseo pa UoC pero tambe pa henter e kolòm di enseñansa. Un otro deseo ku e tabatin for di 2016 ta, integrashon di enseñansa primario, sekundario i tersero. Unabes ku e mucha wòrdu prepará for di abou e ta kana den un liña ku ta drenta nèchi riba otro, ku ta maksimalisá e mucha su potensial. ‘Mi ta kontentu pa bisa ku Minister di Enseñansa a tuma algun aspekto di e plan aki pa mehorá enseñansa pa ta traha riba e posibilidat i igualdat den edukashon. Igualdat den edukashon ta un di mi preokupashon, komo e no ta presente tur ora. Tin mucha ku diferente situashon, no nesesariamente nan no ta inteligente, pero e situashon sosial ku nan ta biba den dje ta stroba nan desaroyo edukashonal. Mi deseo ta pa sigui desaroyá e kultura akadémiko. Ora un studiante bini un charla e no mester partisipá pasó e ta haña un punto pero e mester partisipá pasó e ke sa mas, e ke eksplorá mas, e ke yuda kontribuí na desaroyo di nos pais”, segun sr. De Lanoy.
Porsentahe di graduashon
Sr. De Lanoy a bisa, ku e aña aki nan tin mas o ménos 200 pa 225 studiante ku a gradua. Loke e ta deseá ta pa mas studiante gradua nominal. Mas o ménos 34% di e studiantenan ta gradua ku nominal, ku ta nifiká ku nan ta terminá nan estudio den 4 aña. Ideal ta i sr. De Lanoy ke mira esaki tambe i esei ta pa e porsentahe por oumentá ta 50%. Pero kiko ta stroba e studiante kaba nominal? Sr. De Lanoy a bisa ku e problema ta ku hopi studiantenan ta traha. Hopi studiante ta traha pasó e situashon finansiero na kas no ta esun mihó. Loke ta pasa ku un programa ku ta desaroyá pa tempu kompletu, ta wòrdu hasí den tempu parsial UoC a pensa pa kambia mayoria di e programanan kompletu pa tempu parsial di moda ku e studiantenan por bai traha i sigui lès anochi. Otro problema ta e konekshon entre edukashon sekundario i tersero. Ora e studiante kaba MBO e no ta kumpli kompletamente na e nivel di universidat. Esaki lo nifiká ku un programa di 4 aña ta bai dura 7 aña òf mas tantu. Esaki ta resultá den gastu, tantu pa e studiante pero tambe gastu pa UoC. E rendimentu di e studiante ta kai atras. Si logra di sinkronisá e kolumna aki, e lo kontribuí hopi.
Dosente UoC ta un desafio
UoC tambe ta eksperensiando falta di dosente. Rèktòr Magnificus saliendo Francis De Lanoy a bisa Djasabra ku esaki sigur ta un desafio pa nan. E situashon di salario di e empleado na UOC por mehorá. Pa duna un ehèmpel, e por gana 4 òf sinku be mas tantu den sektor privá. Esaki ta nifiká ku e no ta kompetitivo. Mayoria dosente ta kuminsá traha un par di dia i despues ta ripará ku loke tin eifó ta mas mihó i ta disidí di bai hasi algu otro. Ta bin aserka ku e fondonan disponibel, ta limitá e kapasidat di e instituto di logra hopi di su ophetivonan. Ora bo invertí den enseñansa, e roster di e studiante ta bira mas efisiente. Ademas, e universidat ta dependé di dosente di tempu parsial ku ta kaba di traha atardi i despues bin duna lès. Ofresé salario kompetitivo na UOC lo yuda atraé i mantené personal, kual ta mehora e kalidat di enseñansa i ta oumentá e atrakshon di e instituto. “E studiante ku a skohe pa keda Kòrsou ta papia di ku su amiga òf amigu ku a bai studia na Merka òf na Hulanda. Nan amigunan ta konta nan tur e fasilidatnan ku afó ta ofresé i ku loke Kòrsou ta ofresé no ta nada kompará. Si nos ke mantené nos studiantenan, nos mester sòru pa e fasilidatnan ta nèchi”, sr. De Lanoy a menshoná.
Sigui priorisá inklushon i kalidat
Loke sr. De Lanoy ta bai laga atras pa UoC sigui traha ariba ta e nesesidat pa priorisá inklushon i kalidat. Mester por mira ku kalidat ta forma parti di e operashon di UoC. Algu ku el a bringa hopi tempu riba dje, ta pa for di esun ku ta limpia e kura, baño di UoC òf esun ku ta duna lès, e liña di kalidat mester ta un liña pará den henter su totalidat. Paso esun ku skohe pa bin UoC, ta skohe e universidat paso e produkto tin balor agregá pe. Na momentu ku nos keda di focus riba e punto aki UoC su futuro ta garantisá.
Duna oportunidat na hende nobo
“Dia 4 di desèmber mi lo renunsiá di mi puesto komo rèktòr. Mi no ta penshonado ainda. Mi tin hopi meta ku mi ke logra. E plan ta ku mi lo guia e rèktòr nobo. Na e momentu ei mi lo disidí kua alternativa mi lo skohe. Tambe mi ke dediká mas tempu na un par di mi interesnan”, segun sr. De Lanoy. Ounke e no a yega e edat di penshun, sr. De Lanoy mes a skohe pa baha. El a bisa ku despues di 3 periodo di 4 aña, un total di 12 i 1 aña komo suplente, a yega tempu pa duna espasio na hende nobo. Bo mester duna espasio pa ambiente nobo, pensamentu nobo i inovashon. “Mi no ta bisa ku mi ideanan no tabata inovativo òf nobo pero ora bo hinka un hende nobo bo ta hinka un otro airu. Mi a studia liderazgo muchu pa mi kontinuá komo rèktòr un periodo mas. For di aña pasá mi a palabrá ku Raad van Toezicht ku esaki lo ta mi último periodo, di moda ku nan por a kuminsá buska un remplasante. Ta un prinsipio e ta”, sr. De Lanoy a kontestá.
Nos ta deseá sr. De Lanoy tur klase di éksito i ku Universidat di Kòrsou lo keda riba mesun kaminda positivo ku sr. De Lanoy a laga atras.
