WILLEMSTAD.- Frakshon di MAN-PIN a hasi kambio den e inisiativa di lei pa kambia e lei di órden públiko. Esaki apesar ku Parlamento for di 21 mart 2024 a aprobá e inisiativa di lei ku ta prohibí uso di bakinan di foam, bestèk di plèstik, i saku di plèstik. Den un karta pa presidente di Parlamento, Fergino Brownbill, lider di frakshon di MAN-PIN, Giselle Mc William ta pidi pa manda e revishonnan ku a hasi den e inisiativa di lei pa e órganonan di konseho.
Despues di risibí e konsehonan Parlamento por trata e inisiativa di lei atrobe. Mc William ta bisa ku gobièrnu a indiká ku no por publiká e lei ku Parlamento a aprobá, popularmente yamá ‘lei di plèstik’ pasobra tin stipulashonnan den e lei ku no ta deseabel. Tabata frakshonnan di MAN, MFK, TPK i PNP ku na 2024 a vota por e inisiativa di lei di plèstik. Asina Parlamento a aprobá e lei ku 13 voto pro i 0 kontra.
Frakshon di MAN a kana ku e inisiativa di lei for di 2018. Intenshon tabata ku despues ku Parlamento a aprobá e lei ku gobièrnu ta publiká esaki i despues di 9 luna ta stòp ku uso di bakinan di foam, bestèk di plèstik, i saku di plèstik. Por usa saku di plèstik, pero e mester ta biodegradabel, pues sakunan ku ta “larga” den naturalesa. E inisiativa di lei original sinembargo no a prohibí uso di tur tipo di material di foam.
Durante tratamentu di e inisiativa di lei den Parlamento na 2024 a bin dilanti ku Parlamento di St. Maarten a aprobá un lei similar. Tambe a trese dilanti den e reunion ku e inisiativa di lei a sali for di un lei makro ku Parlatino a aseptá for di 2017 i ku Kòrsou ta hopi lat, pasobra tur otro isla di Karibe Hulandes a aprobá e lei aki basta tempu kaba pasobra nan ke ta un isla duradero.
Mas aleu Mc William a mustra ku e inisiativa di lei ta un promé paso i ta ku Kòrsou por bira e isla di mas limpi den Karibe, Latino Amérika i den mundu. E ta konfia di por mira esaki den futuro. Meskos e parlamentario a mustra ku ta importante pa bini ku un vishon ku no ta karga un koló polítiko ya no ta keda na gobièrnu so kon ta trese kambio.
““Ta di spera ku tin un vishon pa atendé ku e lei aki. E ora ei por sòru pa aki 5 aña Kòrsou tin un vishon kon atendé ku medio ambiente den su totalidat den nos pais.”
