Kambionan no a resultá bon: Oustralia ku viktoria grandi riba Kòrsou

MELBOURNE.- Oustralia fásilmente a golia Kòrsou ayera ku skor di 5-1.

Fred Rutten a hasi kuater kambio na e aliniashon di Kòrsou, kompará ku esun ku el a uza kontra China.

Tahith Chong, Jeremy Antonisse, Shurandy Sambo i Roshon van Eijma a drenta, na lugá di Sontje Hansen, Kenji Gorré, Joshua Brenet i Riechedly Bazoer respektivamente.

Miéntras Oustralia a hasi sinku modifikashon na  e aliniashon ku a enfrentá Kamerun, esaki inkluyendo nan strea Jordan Bos ku ta hunga na Feyenoord.

Tabatin un sorpresa di parti Kòrsou, ora ku Leandro Bacuna a kuminsá e partido mei mei di e liña defensivo, kual a pone ku Kòrsou a hunga den un 5-4-1 algun parti di e wega.

Bacuna a mustra sólido hasiendo esaki, pero un fayo pa despeha e bala a yuda Oustralia bai ariba. Esaki ora ku na di 23 minüt Awer Mabil ta skor pa hasi e wega 1-0.

Bacuna mas despues a drenta bèk den bolante, i a krea un oportunidat. Esaki ora ku na di 33 minüt el a duna Jeremy Antonisse un bon pase, pero e atakante di Kòrsou no por a skor riba dje.

E wega a sosega asina ku Oustralia gana ku skor di 1-0.

Di dos tempu a kuminsá ku Kòrsou hasiendo kuater kambio. Godfried Roemeratoe, Ar’jany Martha, Gervane Kastaneer i Jearl Margaritha a drenta wega na lugá di Comenencia, Chong, Kuwas i Antonisse respektivamente.

Dos di e hungadónan ku a drenta di kambio, a sòru pa e gol di empate pa Kòrsou. Esaki ora ku kabes Kastaneer ta pone e bala, i Martha ta avansá i hopi bunita i trankil ta skor pa empatá e partido.

Karson a hasi dos kambio mas na di 63 minüt ora ku Tyrese Noslin i Joshua Brenet, a drenta na lugá di Shurandy Sambo i Sherel Floranus.

Na di 68 minüt Oustralia ta bai bèk ariba, ora ku Alessandro Circati ta skor ku kabes.

Djis un ratu despues na di 71 minüt Jordan Bos ta hasi e wega 3-1 pa Oustralia.

Gervane Kastaneer na di 77 minüt a bringa un bala kual a yega Jearl Margaritha, ku a krusa pa Leandro Bacuna ku a kòp den man di kiper.

Na di 80 minüt Nestory Irankunda riba un bon akshon ta hasi e partido 4-1.

Sontje Hansen a remplasá Leandro Bacuna na di 82 minüt.

Irankunda ta bolbe skor na di 84 minüt pa Oustralia.

E wega a finalisá asina ku skor di 5-1, i Kòrsou ta finalisá e FIFA Series ku dos derota i apénas un gol anotá. Miéntras ku Oustralia a gana e FIFA Series aki.

Próksimo partido amistoso di Kòrsou ta 30 di mei, ora nan biaha pa Eskosia pa topa e selekshon eskoses.

E partido kontra Oustralia tabata un basta pèrta te ku na di 66 minüt, mirando ku e partido tabata empatá na unu. Pero despues den un lapso di 17 minüt, Oustralia a skor kuater biaha.

Parti di esaki ta pa motibunan di fayonan defensivo, i tambe algun kambio ku no a resultá bon pa selekshon di Kòrsou.

Rutten despues di wega a bisa ku e sa kiko e tin na material despues di e dos weganan na Oustralia, i ku e ta haña ku mester defendé tantu individual komo kolektivo.