WILLEMSTAD.- Ayera i awe e kaminda di Kloof lo ta será pa por kòrta e ramanan. Polis ta informá i ta pidi outomobilistanan prekoushon den e kaso akí.
Segun polis, relashoná ku trabounan ku mester tuma lugá, e parti di Weg naar Westpunt for di Kloof te ku Asunción, ta será ayera djaluna 16 i awe djamars 17 di desèmber 2024 entre 08.00 i 15.30 pa tráfiko di ámbos direkshon.
Un súplika ta bai na tur ku mester hasi uso di e parti di kaminda ei, pa skohe rutanan alternativo pa nan yega nan destinashon.
Ta konosí ku e organisashonnan na Bándabou, entre nan ViBa, a pidi atenshon di instansianan pa ku e situashon di e pida kaminda akí. Áwaseru a kai i e matanan a krese di tal forma ku e tabata forma un peliger pa tráfiko. Ayera finalmente nan bos a keda skuchá i a sera e kaya pa asina por mantené i kòrta e matanan.
