Silvetty de la Paz; SHE Leads Conference
Siman pasá tabata SHE Leads Conference ku e bia aki tabatin komo tema BE(come). E edishon di aña aki tabata mas ku solamente un konferensia. E ta un tributo na nos pueblo, nos istorianan i e kresementu di e ‘Blue Wave of Leadership’ ku ta kresiendo na Kòrsou. Un moveshon di lidernan, kreadornan, profeshonalnan, empresarionan i ‘change makers’ ku ta mustra ku nos isla ta yen di talento, vishon, resiliensia i propósito.
Deskubrí bo mes
Silvetty de la Paz ta inisiadó di e idea di SHE Leads i el a konta Djasabra su historia, kon el a kuminsá i kon lo bai sigui. El a bisa ku SHE Leads a yega serka dje na 2022 na luna di mei pero e no a hasi uso di e oportunidat ei i tabata mihó pa otro hende hasié. Silvetty dado momentu a stòp di drumi bon i p’e drumi bon ta un di e kosnan mas importante. I el a disidí ku tras di e no drumimentu aki tabata sinta SHE Leads. I asina na luna di yüli di e mesun aña el a disidí tòg di dal bai ku e konferensia. Asina e aña ei dia 2 di sèptèmber SHE Lead Conference a tuma lugá pa promé bia, den un sala lata lata ku asta den pouze mester a reahustá e stul e mesanan. Silvetty a kere ku e tabata hasiendo esaki pa otronan so, pero el a realisá ku el a hasié pa e mes pero tambe pa otronan. Esei ta ora bo haña vishon den bo bida, e no ta funshoná pa otronan, e ta mas bien e kaminda pa bo deskubrí mas di bo mes i den e kaso aki, deskubrí e mes.
Kurpa, menta i alma
Kiko SHE Leads ta para p’e, tabata otro punto ku Silvetty a toka, splikando ku aki ta trata di un konferensia di hende muhé, kaminda ta trata entre otro e aspektonan di kurpa, mente i alma. Ta un konferensia kaminda no ta para ketu solamente na abilidatnan ku nos mester tin pero kon nos ta ‘take care’ di nos mes i skucha e yamada riba nos bida. SHE Leads a kuminsá pa trese hende muhé huntu, pa kere den nan mes, e asina yamá hermandat ku ta masha importante. She Leads ta dirigí riba hende muhé i ounke e tema ta liderazgo, nan ta aseptá tur hende pasobra e promé área ku ta lidera ta nos mes i nos bida. Por ta un studiante, aspirante i tur ta bon biní.
Konta nan historia
Kada konferensia di SHE Leads ta konta ku otro personanan ku ta bin konta nan historia. Segun Silvetty tur aña nan tin oradornan i tambe panelistanan. Loke mester menshoná ta ku e tema ta skohe e i no e ta skohe e tema. Silvetty ku su konekshon ku todo poderoso ta haña su tema i asina el a yega na esun di e aña E tema e aña aki ta, Be (come). E BE ta para pa stòp di ta konstantemente hasi algu pero ser abo. I ku e proseso di Becoming, ken bo ta awe no a separá for di otro. E Silvetty di aki sinku aña i esun di awe no ta separá for di otro. Tur dos mester por ko eksistí, den sentido ku e Silvetty di awe ta kana yega aki sinku aña. Hopi bes el a splika, nos ta mira e persona ku nos ta di awe i pens’e unda no a yega i unda nos a faya sin sa ku ta e mundu aki mes ta hiba nos na e siguiente stap. I ora e tema keda aseptá, einan e oradornan ta kuminsá aparesé. Nan ta aparesé sea den un kantika òf den soño òf diferente manera. Kada un ta du n’é e siguransa ku ta nan.
Keda manera bo ta
Por ehèmpel e orador prinsipal e aña aki, e tabatin e for di aña pasá pero e no tabata por pero a bisa ku e aña aki si. Remarkabel ta ku Silvetty tabata topa e persona ei tur kaminda, loke no ta usual asta na airopuerto. Esei a du n’é un indikashon pa tuma akshon pasobra e persona ta keda bin riba su kaminda. Kada un di e panelistanan tabata un regalo pa Kòrsou. Por ehèmpel Richeline Elisa ta un aktris ku a bin biba Kòrsou despues di a kaba di studia. I aki na Kòrsou el a krea un skol di aktris i aktor pa siña hóbennan kon pa aktua. Ta un plataforma ku kisas no tabatin pero el a krea esaki pa por duna otronan. Tambe tin Athena Sulvaran ku ta un abogado di kasonan penal i ku a keda su mes i ounke e ta den un área maskulino, el a keda femenino i a mustra asina ku ni maske den kua espasio bo ta, bo por keda manera bo ta. Tambe tin Vienna Mendeszoon ku aña pasá tabata un partisipante di SHE Leads i e aña aki e ta djòin na un momentu krusial den su bida. El a kere den su mes i den kolaborashon i el a lanta su Pòp up Cafe ku ta bayendo masha bon. Ku esaki Silvetty a mustra ku e tin partisipante ku a bira orador i e tin partisipante ku awe ta asta parti di e tim di SHE Leads. I di e forma aki nan ta evolushoná i krea espasio pa kresementu di e hende muhé. I meskos tin partisipante ku a kuminsá ku e konferensia for di 2022 i a keda bini den tur t’e esun di e aña aki 2026. I meskos ku e partisipantenan, tin kompanianan tambe ku a kuminsá for di 2022 i a sigui krese ku SHE Leads durante di tur aña kreando espasio pa sea grupo di trahadó òf individual por tuma parti na e konferensianan. I asina ta logra impaktá mas tantu hende muhé posibel i asina tin un grupo di hende muhé den hermandat. I kaminda tin mas hende muhé huntu ta kos bon ta sosodé. I ta algu ku no por splika pero djis imaginá e konekshon di hende muhé huntu, kosnan ta kambia. Intenshon ta pa ta perfekto den esaki i asta den e aspekto laboral pasobra alfinal segun Silvetty, e mes ku a traha den e sektor korporativo i finansiero, e sa ku e hermandat bou di hende muhé ta krusial pa asina kos por kambia.
SHE Leads a krese
Na 2022 ora SHE Leads a kuminsá ku un sala ku por a karga 80 hende pero nan a hinka 90 den dje. Na 2025 e sala tabata unu di 200 hende. I e aña aki tambe ta den e mesun direkshon, e evento ta Sold Out. E ta aspirá pa no mas ku 150 partisipante pa asina por tene e grupo di tal forma ku tur por haña e atenshon ku nan meresé. E toke personal ta importante. E ke kòrda kada hende na nan nòmber. E hende ta sintié ku e ta konta ora e otro por kumind’é na su nòmber.
Tur kos ta posibel
Despues di 5 aña tras di otro organisando SHE Leads Conference pa hende muhé i trahando, hopi den hende muhé Silvetty por bisa ku tòg el a ripará ku e hende muhé no ta kere sufisiente den su mes. I e motibu ta diferente. E por ta kultura, aspekto di e sistema kon e ta traha i dil ku miedu diferente. E situashon serka e hende muhé hopi bia ta ku e tin di proba di mes i no por konektá ku otro. I ta algu ku for di chikí nos ta lanta kuné; nos ta haña nos mes muchu yen, nanishi muchu plat, wowo ta muchu chines, semper tin algu pa bo kritiká na bo mes. I ta bin aserka ku nos no a siña kon dil ku miedu. Esei ta e puntonan ku ta stroba e hende muhé di logra siendo e hende muhé mester sa ku si e djis sera su wowo i pensa, tur kos ta posibel.
Liderazgo
Silvetty no ta solamente SHE Leads. El a splika nos ku e tin dos negoshi; Nostra Growth ku ta enkargá su mes ku yuda profeshonalnan atkerí e habilidatnan sòft manera di liderazgo, pensamentu krítiko i komunikashon. E ta drenta espasionan di kresementu huntu ku kompania òf riba petishon di profeshonalnan mes e ta duna training, workshop i guia. I den e parti feminair Nostra Growth ku ta e otro kompania e ta duna mentoria, i guia na hende muhé den posishon di liderazgo òf na esnan ku ke bai den posishon di liderazgo pero no a yega einan ainda. E ta krea tambe espasio pa den sírkulo di hende muhé, ku un máksimo di 8, un bia pa luna ta bin huntu i traha riba nan konfiansa propio i sigui konstruí na ken abo komo persona ta. SHE Leads Conference ta un proyekto di Feminair by Nostra Growth i ta ehekutá un bia pa aña. Ounke el a krese di tal forma ku e aña aki lo bai tin sigur 4 konferensia, entre otro na Kòrsou, lo bai St Eustatius, kaminda e ta ferwaktu sigur 100 partisipante, despues di einan ta bai Amsterdam ku lo traha ku 50 hende muhé, i 24 di òktober lo tin e konferensia na Aruba. Ku esaki Silvetty a pone énfasis ku SHE Leads ta henter aña. I den e paisnan menshoná, tambe na 2023 SHE Leads a tuma lugá na Colombia/Bogotá i tabata un edishon kompletamente yen. E evento a krese di tal forma ku awor nan tin di skohe unda ta bai e aña ei. I den 2027 e lo konsentrá tambe den Latino Amérika.
SHE Leads ta ekspandé su alanan
E soño grandi di Silvetty ta pa SHE Leads sigui eksistí pafó di Kòrsou. E aña aki ta su último aña na Kòrsou i awor ta momentu pa otro hende muhénan bai karga SHE Leads Movement i asina krese di paden bai pafó. Silvetty a bisa ku ora e sera su wowo, e ta wak kosnan grandi ku ainda e no por splika. Pero dos kos lo pasa; SHE Leads lo sigui internashonalisá i lo tin mas evento pafó di Kòrsou i aki na Kòrsou lo bai krea espasionan di kòmbersashon pa e hende muhé i e hende hòmber. E evento a madurá di tal forma ku el a krea espasio pa e hende hòmber tambe por djòin. Silvetty a bisa ku tin un realidat i esei ta ku e hende muhé bin huntu, nan selebrá i hasi kambionan, sin e hende hòmber no ta aselerá e kambionan deseá. E hende hòmber ta klave pa kualke desishon ku e hende muhé tuma den liderazgo. I p’esei for di momentu ku el a kuminsá ku SHE Leads e intenshon tabata pa no papia di liderazgo di hende muhé i liderazgo di hende hòmber pero papia di e totalidat. I einan e meta ta. Te ainda Silvetty no a duna guia na e hende hòmber ounke na algun okashon tabatin hende hòmber tambe den e konferensianan.
Konekshon ku bo mes
Loke pa Silvetty e hende muhé tin di pone mas atenshon riba dje ta pa konekshon ku bo mes. Skucha bo kurpa i si e mester di sosiegu du n’é esaki. E sosiegu ei por duna bu e chèns pa por haña bo mes, pensa i antisipá si algu por bai pasa. E ta kere ku e hende muhé mester hiba un kòmbersashon profundo ku su mes i pa asina e mes tin pas den e vershon di su mes. Den Silvetty pa e por a hasié e mester a krea espasio pa e parti femenino pa du n’é guia i awe e por selebrá e Silvetty di 5, 10 i tambe 40 aña i sin husga bo mes. Ora bo ta den konekshon ku bo mes, bo ta duna bo mes sin husga bo mes.
Bosnan inspirado
Huntu ku ‘keynote speaker’ Silvetty de la Paz, e podio siman pasá a konta ku diferente bos inspiradó manera Leslie-Ann Brodie komo oradó, huntu ku panelistanan Athena Sulvaran, Vienna Mendeszoon, Richailine Elisa, Jason Fullinck i otro lidernan lokal ku ta sigui hasi impakto den nan industria i komunidat. Durante e SHE Leads Brunch riba djasabra, 30 di mei, kantante di ópera di renombre internashonal Tania Kross a kompartí su historia personal, trayektoria profeshonal i lèsnan tokante outentisidat, perseveransia i transformashon personal. Den transkurso di añanan, SHE Leads a bira un di e plataformanan di ‘female empowerment’ ku mas impakto den Karibe, kreando espasionan sigur pa kòmbersashonnan ku sentido, espasio pa ‘netwerk’, desaroyo di liderazgo i konekshon outéntiko.
