CIUDAD DE MEXICO, México (AFP).- Dos siman promé ku inisio di kampaña presidensial, desena di míles di opositornan mehikano a manifestá pa un “voto liber”, na momento ku e dirigente ofisialista Claudia Sheinbaum, faborito den enkuestanan, a formalisá su kandidatura.
Bistí na blanku i rosa, e atversarionan dje presidente iskierdista Andrés Manuel Lopez Obrador a yena Zocalo, e plasa prinsipal di Ciudad de México, kaminda tin e Palasio Nashonal ku ta sede di gobiernu.
“No ta mishi ku nos demokrasia”, segun un dje pankartanan riba e podio kaminda vários dirigente a pronunsiá diskursonan faltando ménos ku tres luna pa e elekshonnan di 12 di yüni.
Miéntras tantu, Sheinbaum, físiko i eks-alkalde dje kapital di 61 aña, a registrá su aspirashon na Instituto Nacional Electoral (INE) kompañá pa algun shen simpatisante.
“No tin ni un enkuesta ku no ta duna nos e bentaha di dos kontra di un, laga nos ban defendé e bentaha ei. Nos no ta konfia pasobra nos ke un triunfo kontundente”, segun Mario Delgado, presidente dje partido Morena di Sheinbaum i tambe dje aktual presidente López Obrador.
Sheinbaum aktualmente tin 64% dje preferensianan, segun un enkuesta di e kompania Oraculus, loke ta indiká e posibilidat ku pa promé biaha den historia, un hende muhé lo por ta na kabes di gobièrnu di México, e di dos ekonomia latinoamerikano i ku un kultura tradishonalmente di machismo.
“E tin tur kos pa gana. Ta tempu kaba pa un muhé prepará manera su persona por gana un elekshon. Lo e hiba e pais na un otro posishon mas ariba na nivel ekonómiko, polítiko, atministrativo i na nivel sosial”, segun Guadalupe Carreño, di 54 aña.
Leu na di dos lugá, ku 31% di apoyo, ta figurá e kandidato di orígen indígena Xóchitl Gálvez, kandidato di un koalishon dje partidonan tradishonal PRI, PAN y PRD, kende ta presentá ku un agènda sentroderecha.
