FRESNILLO (AFP).- E kampaña di elekshon a start na México ku e perspektiva di konsagrá e promé hende muhé komo presidente entre e iskierdista Claudia Sheinbaum i e opositor di sentro derecho Xóchitl Gálvez, algu nobo den e pais aki marká pa un kultura machista.
Sheinbaum, eks-alkalde di Ciudad de México di 61 aña, ta start kampaña ku 63% di preferensia pa e elekshonnan di 2 di yüni, leu riba e 31% di Galvez, ingeniero di kòmpiuter i tambe di 61 aña, segun un enkuesta dje firma Oráculus. Jorge Alvarez, diputado di sentro iskierda di 38 aña, ta di tres ku 5%.
Galvez djabièrnè mardugá a start na Fresnillo, estado den nort di Zacatecas, e promé etapa di un rekorido pa tres siudat kaminda gran parti dje poblashon ta sinti su mes insigur.
“Mi ta start mi kampaña ku un señal di profundo rèspèt na e víktimanan dje violensia den México”, segun el a bisa i a pidi un minüt di silensio, ku su moketa robes hisá na laria.
“Ta basta ku brasamentu di delinkuentenan”, segun e kandidata opositor a bisa dilanti di algun shen simpatisante.
