Kampesinonan tin miedu di plannan di fumigashon

E diskushon riba pro i kontra di fumigashon riba áreanan di kultivo di koka ta bolbe lanta kabes.

BOGOTA.- Kampesinonan den zona di selva di Colombia kaminda ku gobièrnu tin plan di fumigashon aéreo ku un ‘herbisida’, ta hopi preokupá. E presidente Abelardo de la Espriella ta promové un polítika di man duru pa kombatí narkotráfiko den Colombia, e pais ku e produkshon mas grandi di kokaina na mundu.
Luna pasá un hues a ordená pa suspendé temporalmente e spùitmentu aéreo di ‘herbisida’ riba kultivonan di droga den e region amazóniko di Putumayo, pero e mandatario di derecha a bai kontra i e bisa ku “e fumigashon ta sigui”.
E anunsio a generá hopi preokupashon, spesialmente serka kampesinonan i esaki pa insidente den pasado ku e fumigashon a afektá salú di hende.
Segun gobernador John Molina, “hopi mama na estado a pèrdè nan yu, nos a sufri di kontaminashon riba founa, flor i otro kultivonan legal”.
E ‘herbisida’ ta keda usá ku ‘glufosinato’ di amoniak, konsiderá di forma moderá komo peligroso pa salú segun Organisashon Mundial di Salú.
Segun e gobernador, den e zona tin mas ku 40.000 hèktar di kultivo dje blachi di koka, base di kokaina, i komo 22.000 famia ta dependé dje entrada generá pa e kultivonan akí.