GRESIA, AFP.- Forsa di seguridat griego a yega masalmente na Lesbos djabièrnè pa yuda konstruí un shelter nobo pa míles di migrante desampará, despues ku un kandela masivo a destruí nan refugio e siman aki.
Sentenáres a protestá pa nan libertat bisando ku nan no kier un refugio nobo.
Mayoria persona mester a drumi sigur tres anochi pafó, kantu di kaya, riba terenonan di parker òf na pòmp di gasolin.
“Nos a sufri durante tres dia. Nos tin hamber, set, nos no tin tualèt ni baño”.
Mas o ménos 11.500 solisitante di asilo, inkluyendo 2.200 muhé i 4.000 mucha no tin un shelter adekuá pa biba aden, segun indikashon di e agensia di refugiado di Nashon Uní.
Militar griego a kuminsá yuda ku konstrukshon di e shelter nobo, pero mester a usa helikòpter pa evadí manifestantenan ku a blòkia kaminda pa protestá kontra e konstrukshon nobo di e migrantenan.
