PARIS, AP.- Djaluna a surgi un kandela enorme den sekshonnan haltu di e katedral históriko Notre Dame na Paris miéntras e renobashonnan ta wòrdu realisá, poniendo un di e tesoronan arkitektóniko mas grandi na riesgo.
E kandela a kousa ku e punta di e katedral su toren a kolèps i a ekstendé pa su torennan rektangular. E hefe di bombero di Paris, Jean-Claude Gallet, a bisa ku e struktura a logra wòrdu salbá dor ku ekiponan di bombero a impedí ku e kandela ta sigui propagá pa otro partinan di e katedral.
E katedral aki tin obranan di arte na un balor inkalkulabel i ta un di e atrakshonnan turístiko mas famoso na mundu.
E kousa di e kandela no ta konosí, pero prensa a informá ku un brigada di bombero na Paris a indiká ku e kandela “ta ligá” na un proyekto di renobashon di 6,8 mion dòler den e toren di e iglesia. E sekshon aki tabatin 250 tonelada di plomo. Fiskal a deskartá ku ta trata di un kandela provoká òf ku esaki ta relashoná ku terorismo i indiká ku e kaso ta wòrdu konsiderá komo un aksidente.
Presidente franses Emmanuel Macron a trata e kandela komo un emergensia nashonal. El a bishitá e sitio i a papia ku agentenan polisial di Paris. El a komprometé na rekonstruí e katedral i a bisa ku lo pidi yudansa internashonal pa logra esaki.
