UPDATE: Kandela no ta stroba tareanan Ontvanger ni Inspekshon

WILLEMSTAD.- Na e momentunan aki gobièrnu di Kòrsou ta dunando komunidat informashon relashoná ku e kandela ku a tuma lugá awe mardugá den edifisio di Ontvanger.  Minister Gijsbertha a lamentá loke a sosodé i a bisa ku e investigashon a kuminsá kaba i ta den man di hustisia. A tuma e kos aki hopi na serio i lo laga hasi un investigashon forensiko.

Ontvanger Alfonso Trona di su banda a splika ku Ontvanger no a pèrdè data, pues tur informashon ta bon sigurá. E kandela no ta stroba siudadano ni kompania pa nan kumpli ku nan obligashon. Tur esnan ku tabata bai Ontvanger pa paga awor por hasi uso di Pagomátiko i kumpli ku tur pago belasting sin niun gastu èkstra. Restitushon tambe ta sigui normal via banko.

Jamila Isenia inspektor di impuesto na su turno tambe a bisa ku tur dato ta safe. E trahadónan no por sinta den e edifisio ei, pero por sigui traha. Inspekshon ta sigui duna servisio asina nan haña un lugá pa pone e trahadónan.

Sherwin Casper direktor di SBAB a duna di konosé ku e edifisio di BAB si no a haña niun daño, pero a para tur trabou te djaluna pa duna espasio pa investigashon. Mas detaye den EXTRA.

Kandela feros a destrui gran parti di Ofisina di impuesto

Willemstad.- Den oranan di marduga, un kandela feros a destrui gran parti di Ofisina di impuesto na e parti kaminda e ofisinanan di departamentu di kobransa ta konsentra.

Pa awe ofisina di impuesto lo ta sera mientras ku tin investigashonnan tumando luga pa asina wak kiko of ken lo por a kousa e kandela aki.

Update Brantwer no tin niun indikashon di eksploshon

WILLEMSTAD.-Un kandela a kousa hopi daño na e parti abou di e edifisio di belasting den kua tin Ontvanger, Inspekshon di impuesto i otro departamentunan. For di e prome momentu ku brantwer a haña notifikashon di e kandela mesora a manda unidat na e sitio. Elvin Regina, komandante di brantwer den deklarashon na EXTRA a duna di konosé ku na yegada di e prome unidat ya kaba nan a nota ku ta trata di un ‘uitslaande brand’ pues un kandela grandi ku asta por a mira kon vlamnan di kandela ta Sali for di bentananan.

E area unda brantwer a topa e kandela, esta e parti abou di e edifisio tabata kompletu na kandela i mesora e unidat a aktua pa kombatí esaki. Brantwer a logra di kontené e kandela den e area unda nan a topa kuné, di tal manera ku e kandela no a logra ekspand’é bai otro áreanan. Tin hopi bentana i esei a yuda brantwer den nan trabou pa kombatié e kandela.

Riba e pregunta spesífiko di EXTRA si ta trata di un kandela intenshonal sr. Regina a bisa ku e parti di investigashon ta den man di TOD di polis i reshèrshe táktiko, naturalmente brantwer ta sostené polis den e investigashon. E konklushon final di e investigashon ta den man di polis. For di momentu ku e kaso a bira konosí EXTRA tambe a tuma nota di bastante rumor ku lo tabatin un eksploshon den e edifisio. Riba esaki e komandante di brantwer a bisa di forma enfátiko ku brantwer no por konfirmá ku a tuma lugá niun eksploshon. Niun hende no por a bisa ku nan a tende un eksploshon i te ainda e investigashon no ta asina leu ku lo por bisa nada den e direkshon ei. Di tur manera brantwer no por konfirmá nada di niun eksploshon komo kousa di e kandela.

Riba e pregunta si tin gasnan venenoso òf otro material kímiko ku e kandela a produsí ku lo por tin efekto riba e area sr. Regina a indiká ku den tur kandela tin material kímiko ta bai den aire. Un kos ta sigur no tin niun indikashon ku lo tabatin asbèst.

Traha normal

E edifisio di impuesto ta sera debí na e kandela i riba esei a puntra e komandante si lo por sigui hasi uso di edifisio. Sr. Regina a splika ku e struktura di edifisio a keda bon, pues or sigui hasi uso di e edifisio sin problema. E area abou unda tabatin e kandela mester pasa den un proseso di rekonstrukshon i e otro áreanan ariba si por sigui funshoná. Solamente mester hasi limpiesa, saka holó di huma i kaba por sigui usa e edifisio sin problema.

 

SHARE

LEAVE A REPLY