Riba e potrèt por mira bomberonan kolombiano bringando e kandela den e siudat di Tolima. Komo 20.000 hèktar di mondi a kima.
BOGOTA (AFP).- Diferente foko di kandela na Colombia ya a kima komo 20.000 hèktar di mondi i kultivo den parti wèst dje pais, algun di nan provoká den un temporada di sekura i dje fenómeno El Niño.
Vlamnan enorme di kandela ta kore den mondinan dje departamento di Tolima, na momentu ku e pais ta atendé e krísis despues di un potente temblor di dos siman pasá i ku a laga 321 morto i míles di kas destruí.
“Tolima ta kimando, 24 kandela di mondi pareu ta nifiká ku tin un emergensia ambiental, un emergensia ekonómiko i un emergensia sosial”, segun e gobernadó lokal Adrian Magali Martiz.
Riba tera i den aire, ekiponan di bombero ta purba na kontrolá e vlamnan ku ta intensifiká debí na e temporada den kua tin masha tiki áwaseru i ta presentá kondishonnan di klima ku tin di aber ku e aktual fenómeno El Niño, ku ta esun di mas intenso ku a yega di keda dokumentá.
E gobernadó a denunsiá ku hopi dje kandelanan a kuminsá komo “un kandela kontrolá”, un práktika normal den zonanan di krio di bestia pa limpia e áreanan. “Pero e kandela no ta komprondé e asuntu di situashon kontrolá. Den e situashonnan aktual kualke chispa por resultá den un tragedia”, segun e gobernador.
E kandelanan a destruí kultivonan kompleto di lamunchi, mango, kòfi i a laga míles di baka sin kuminda.
Segun e outoridat di atenshon di desasternan, aktualmente e pais tin11 kandela aktivo den Tolima i unu den Cundiamarka (sentro). Dies mas ya a keda kontrolá.
