NEW YORK, AP.- Segun retrasonan i kanselashon di buelonan ta ekstendiendo pa un di kuater dia, Delta Air Lines ainda no por konfirmá si e kandela chikitu òf intento pa paga esaki tabata kousa di e problemanan andando.
E konsolashonnan a kuminsá djaluna mainta, na momentu ku un komponente eléktriko den su sede sentral na Atlanta a faya, segun direktor ehekutivo, Ed Bastian, a indiká na The Associated Press. Esei a kousa ku e transformatòr ku ta proveé elektrisidat na e sentro di dato di e aerolínea a paga. E sistema a pasa over pa un surtido di emergensia pero no tur server tabata konektá na e fuente aki, loke a kousa e problema.
“E fayo di ekipo a lòs un kandela chikitu. El a wòrdu pagá inmediatamente i no tabatin mester di yama bomberonan”, asina bosero di Delta Trebor Banstetter a bisa den un mensahe eléktriko djaweps.
E aerolínea no a bisa kon e kandela a wòrdu pagá ni si medionan pa paga esaki a daña e ekipo eléktriko òf algun di e ‘server’-nan.
Delta a kanselá mas di 2.100 buelo e siman aki, mayoria di nan djaluna i djamars. Pero pa djaweps ainda tabatin mas problema i FlightStats.com a reportá ku tin por lo ménos 30 kanselashon di Delta i kasi 300 retraso mas. Algun tabata debí na problemanan ku kòmpiuter i otro pa mal tempu, segun indikashon di e aerolínea.
