E kandidato demókrata di Senado pa estado di Michigan Mallory McMorrow
TORONTO, CANADA, AFP.- E kandidato demókrata di Senado pa estado di Michigan a denunsiá djárason ku presidente Donald Trump ta blòkiando inougurashon di un brùg nobo entre Merka i Canada, pa faboresé persona ku a hasi donashon.
E akusashon di Mallory McMorrow a kuminsá sirkulá algun luna pasá. Esaki a sosodé despues ku Trump a publiká informashon engañoso riba Brùg Internashonal Gordie Howe. E brùg a kosta 4.700 mion dòler i ta konektá Detroit ku Windsor, na Ontario.
E promé minister kanades, Mark Carney, a anunsiá riba 9 di yüni ku lo inougurá e brùg ofisialmente den tres dia. Sinembargo, dos dia despues el a kambia di plan pa motibu ku Washington a pidi pa kanselá apertura di e brùg.
Den un anunsio di kampaña i un komunikado di prensa publiká djárason, McMorrow a denunsia ku e retraso ta pa motibu di Trump. E presidente ta aktuando na nòmber di Matthew Moroun, un multimionario ku a duna un mion dòler na un komité di akshon polítiko pro-Trump, MAGA inc.
Famia Moroun ta kontrolá e brùg Ambassador, ku tin vários dékada ta konektá Detroit i Windsor.
Merka a kritiká ku a konstruí e brùg kasi sin materialnan merikano i ku no ta permití esaki su apertura te ora ku esaki bira propiedat di Merka.
The New York Times a informá den febrüari ku Trump a kritiká e brùg Gordie Howe despues di un reunion entre Morpun i e sekretario di Komèrsio di Merka, Howard Lutnick.
