BOGOTA (AFP).- Hustisia di Colombia a ordená e kandidato ultra derecha pa presidensia Abelardo de la Espriella pa e pidi despensa di forma públiko pa ekspreshonnan ‘seksista’ durante di un entrevista i pa a preshoná un periodista pa hasi komentario riba su genitalnan.
De la Espriella den e promé buèlta presidensial djadumingu último no a logra na haña sufisiente apoyo pa evitá e balotahe di 21 di yüni kontra dje senador Ivan Cepeda. Un hues di Bogota a dun’e un ‘deadline’ di 48 ora pa hala su palabranan aden i pidi despensa pa komentario ku ta konstituí “un forma di violensia” i ta “stéreo tiponan históriko diskriminatorio kontra di hende muhé”.
Den un entrevista ku a bai viral riba retnan sosial, e kandidato “via di su telefòn selular a mustra un potrèt íntimo i a bisa di a haña apoyo di ‘elektorado femenino’ via dje potrèt ei. Despues el a insistí pa un periodista presente mira e potrèt i komentá riba e dama, usando frasenan manera: “aserk’é i bisa mi kiko bo ta mira” i “bo no mester ta tímido” den un konteksto di “insinuashon seksual’. E kandidato sa haña hopi krítiko pa su komentarionan ‘seksista’ i homofóbiko.
“No tabata un simpel komentario. Tabata falta di rèspèt pa mi i mi trabou. “M’a sinti mi vulnerabel i akosa”, segun e periodista impliká a skirbi riba X.
E kandidato a reakshoná riba e mensahe i a pidi despensa, bisando ku “tur kos tabata den un konteksto di humor”.
