CARACAS, AP.- Ku ménos di seis luna di elekshonnan presidensial, Hugo Chavez apénas a kuminsá su kampaña. Na lugá di esaki, e tabata den su lucha kontra kanser, ku biahenan konstante pa Cuba pa haña tratamentu i primintiendo su públiko ku e lo superá su enfermedat.
Apesar ku e kanser a kaba ku e ambishonnan presidensial di hopi polítiko, pa Chávez e lucha kontra e enfermedat aki a bira e echo prinsipal i stándart. E kanser a fungi komo un rekurso polítiko den e kaso di su estado di salú pa bai elekshonnan na òktober.
Siman pasá, Chávez a yora miéntras e tabata tene man di su mayornan durante un misa pa despues supliká Hesukristu pa dun’é mas tempu di bida.
“ Dunami bo korona Kristu, dunami e, mi ta sangrando. Dunami bo krus, 100 krus, mi ta
karga tur, pero dunami bida pasó ainda mi tin kosnan di hasi pa e pueblo aki i pa e patria aki. No bai ku mi ainda”, asina e mandatario a bisa den un transmishon bibu na nivel nashonal.
Despues Chávez a bisa ku e tin fe pa un “milager” miéntras e ta someté na terapia na Cuba i despues di dos sirugia kaminda a saka un di dos tumor den su área pelviko.
