Trahadónan di reskate ta karga un dje restunan mortal ku a saka for di bou di loke a sobra dje klup nokturno den e kapital dominikano.
SANTO DOMINGO.- Trahadónan di reskate den oranan di ayera tardi a kaba ku trabounan pa saka kurpa i buska sobrebibiente den e diskotèk Jet Set, sakando e loke nan ta kere ta e último 20 restunan mortal. E saldo di mortonan den e niteclub a yega na 124.
Famianan di esnan ku a desaparesé a reuní alrededor di Jet Set, di kua e dak a bin abou djamars último den pleno konsierto dje popular kantante di merengue Rubby Perez, kende tambe a fayesé den e insidente.
Tambe grupo grandi di famia a akudí na hòspitalnan i na kasnan mortuario sperando notisia òf identifikashon di famianan. A traha un lista ku nòmber di víktimanan i a pone esaki na sitionan kaminda tur hende por a tuma nota.
“Nos ta trahando pa saka 20 kurpa mas”, segun e general José Luis Frómeta Herasme, hefe di kuerpo di bombero di Distrito Nashonal. “Awe mes (pues ayera) nos lo kaba ku e trabounan di reskate”, segun el a duna di konosé.
For di den laira por a mira e buraku enorme ku a keda na momento ku e dak a bin abou. Mas ku 300 trahadó di reskate durante hinter dia di ayera a traha den e loke a sobra dje edifisio. A usa krannan di konstrukshon pa kita e murayanan enorme ku tambe a kai riba e víktimanan.
Ekspertonan for di Pto. Rico i Israel a yega na e kapital dominikano pa yuda den e operashonnan.
E kantidat di herido a keda na 150. E hefe di operashon, Juan Manuel Mendez, a deskartá ku por haña mas víktima na bida.
Un mama di nòmber Mercedes Lopez tin un yu pèrdí. El a bisa na AFP ku “nos no ta haña su nòmber riba lista pero tampoko na hospitalnan”.
Larissa Minier ta karga speransa di haña notisia di su ruman. “Nos tin speransa ku Dios lo sak’é na bida”.
Na Merka, e hefe di diplomasia Marco Rubio, a informá ku “por anunsiá morto di sigur un siudadano norteamerikano”.
No tin un sifra ofisial dje kantidat di persona ku a asistí na e konsierto di Rubby Perez, un dje bosnan mas emblemátiko di merengue ku éksitonan manera “Volveré”, “Enamorado de Ella” i”Buscando tus besos”.
E niteclub tabatin kapasidat pa 700 persona na mesa i 1.000 riba pia.
E kurpa di e kantante a keda rekuperá den oranan di mardugá. Gobièrnu ya a disidí ku djaweps den Teater Nashonal lo rindi homenahe na Rubby Perez.
Mas aleu a pèrdè nan bida den e tragedia e èks-peloteronan di Liga Grandi Octavio Dotal i Tony Blanco, komo tambe e gobernadó di provinsia Monte Cristi, Nelsy Cruz.
Famia i konosínan ta wardando riba notisia di nan sernan kerí ku tabata den e klup nokturno Jet Set.
