Momentu ku ayera nan a saka un kurpa mas for di laman. Ketu bai outoridatnan no sa kuantu persona presis tabata riba e boto ku a senk entre Rep. Dominikana i Pto. Rico.
SANTO DOMINGO (AFP).- E kantidat di morto di un boto ku a senk miéntras e tabata biaha di Rep. Dominikana pa Pto. Rico a subi na shete, segun outoridatnan a konfirmá despues di tres dia di búskeda.
Na un promé instante, outoridatnan a kalkulá ku tabatin entre 40 pa 50 migrante riba e barku, segun relato di sobrebibientenan. Pero te ku ayera tardi no por a konfirmá presis e kantidat di okupante.
“Nos ta sera e dia ku un kurpa mas”, segun direktor provinsial di Defensa Sivil, Fernando Castillo.
Defensa Sivil ayera a referí na e kantidat di 17 sobrebibiente, entre nan siudadanonan haitiano i dominikano.
“Nos lo sigui ku e trabounan pasobra ainda ta mira mas kurpa, pero no sa dirèkt kuantu hende tabatin riba e barku”, Castillo a agregá.
E ekiponan awe lo bolbe subi laman pa buska i segun e resultado, nan lo evaluá si ta sigui ku e operashonnan pa mira si ta topa ku mas di esnan pèrdí.
“Nos a yega di tin milager di personanan ku a aparesé despues di kuater, sinku òf seis dia”, segun nan a duna di konosé.
Segun outoridatnan, esnan ku tabata riba e boto a purba biaha di manera ilegal pa Pto. Rico, dilanti kostanan di Juanillo, provinsia di La Altagracia. E ruta ta di mas o ménos 130 km pa Pto. Rico.
