E ‘major’ di New York Eric Adams (meimei) ta tene un flor den man na momento di kana pasa dilanti e loke a sobra dje klup nokturno Jet Set na Santo Domingo.
SANTO DOMINGO.- E sifra di mortonan komo konsekuensia di dak di diskotèk ku a bin abou na Rep. Dominikana a oumentá te na 231, segun un balans nobo presentá pa gobièrnu.
E dak dje klup nokturno Jet Set a basha’den den mardugá di 8 di aprel. E insidente a tuma lugá durante un konsierto dje popular artista Rubby Perez, kende tambe a pèrdè su bida den e aksidente.
E minister, Faride Raful, ayera a duna di konosé ku “e kantidat di víktima fatal a subi i yega na 231 persona; 221 a keda hisá na e zona i 10 a muri despues den hospitalnan”.
Servisio di salú públiko a informá ku 12 pashènt mas ta den hospital, di kua tres den kondishon grave. Otro pashènt a keda trasladá pa Pto.Rico, for di unda e ta bin, riba petishon di su famia.
Gobièrnu dominikano a ordená un investigashon riba e suseso i pa esaki a forma un komishon di ekspertonan lokal i estranhero.
E presidente, Luis Abinader, a bisa ku lo e “respetá ku ta hasi hustisia manera mester ta”.
“No ta bai topa nada ku ta un estorbo di gobièrnu den aspektonan di hustisia”, segun el a duna di konosé.
