E situashon ta di real preokupashon na Venezuela, mas ainda teniendo kuenta ku tin míles di hende di kua no sa nan paradero.
CARACAS (AFP).- E balanse di víktimanan di dos temblor na Venezuela a subi na 1.943 morto i mas ku 10.500 hende heridá. E presidente di parlamento di e pais, Jorge Rodriguez, a bisa ku tin 15.866 persona afektá pa e temblornan di 24 di yüni. Un ekipo di trahadónan di reskate Jordano ayera a reskatá un mucha di tres aña kende a keda derá bou di ruinanan.
Den e zona sera dje temblornan, den e estado di La Guaira, a reskatá un total di 6.461 persona te ku djamars, e mas resien un mucha di dos aña den oranan di djamars mardugá.
Segun e kálkulonan ofisial, e dia dje temblor tabata den kareda di 30.000 persona den e estado na kosta, entre e lokalidatnan di Catia la Mar i Caraballeda, di kua entre 13.400 i 13.500 a logra sali “riba nan mes forsa òf ku yudansa di otronan”.
Gobièrnu venezolano ta evitá na papia di personanan pèrdí, pero segun sifranan presentá ayera esei ta varia entre 7.000 pa 10.000 persona ku no ta figurá entre esnan ku a keda salbá na bida na La Guaira i tampoko entre e mortonan ku a keda reportá.
Te ku ayera a instalá 14 sentro di refugio na La Guaira i 55 mas den Caracas i otro siudatnan.
