WILLEMSTAD.- E kantidat di morto komo konsekuensia di e temblor na Colombia a subi na por lo ménos 224. Asina outoridatnan lokal a bisa djamars mainta 11 di ougùstùs. E parti wèst di e pais a keda sakudí djaluna pa un temblor di magnitut 7,4. Sentenáres di hende tambe a keda heridá.
Ekipo di reskate ainda ta buskando víktimanan di e temblor, ku por a sinti tambe den paisnan bisiña. Míles di kas i edifisionan a sufri daño òf ta kompletamente destruí komo konsekuensia di e temblor. Ta posibel ku ainda tin hende bou di e restunan di piedra ku blòki. Entre otro, hòspitalnan i otro fasilidatnan di kuido, skolnan, infrastruktura i aeropuerto a sufri daño.
Presidente Abelardo de la Espriella, ku a asumí su funshon siman pasá, a deklará estado di emergensia. Ku e medida aki, por koordiná e ayudo mas lihé i e trabounan di rekonstrukshon por kuminsá mas lihé.
Djaluna último, e presidente a anunsiá medidanan pa yuda famianan afektá pa e desaster. Pereira, Cali i Manizales ta entre e siudatnan ku a senti e efektonan mas pisá di e temblor.
FOTO AFP
