Ekiponan di reskate ta buska viktimanan despues ku áwaseru severo a okashoná skùifmentu di tera den áreanan sùitost di Brasil, okashonando hopi morto.
BRASILIA (AFP).- Por lo ménos 23 persona a muri i 43 ta pèrdí pa motibu di áwaseru torensial den zùitost di Brasil. Un bon áwaseru ku a sorprendé gran parti dje poblashon djaluna anochi. Te ku ayera tardi a registrá 16 morto den e munisipio di Juiz de Fora i 7 den Ubá, tur dos den e estado di Minas Gerais.
E kayanan a keda transformá den riu, kousando dañonan struktural. Un video a mustra kon un edifisio haltu den algun sekònde a basha den otro.
E presidente Luiz Inacio Lula da Silva a rekonosé e estado di kalamidat den Juiz do Fora i a sòru pa “alerta máksimo” di defensa sivil nashonal i a manda refuersonan pa e region pa yuda den trabounan di reskate.
Juiz de Fora ta un munisipio di 540.000 abitante, ku pa loke ta bai e luna akí a konosé 584 milimeter di awa.
Segun e mayor di Polis Goulart, 12 kas a basha de otro dilanti wowo di bomberonan. “Un kantidat di hende tabata den nan kas den oranan di anochi, na momento dje yobida”, segun el a lamentá. Defensa Sivil a kalkulá na 440 e personanan ku mester a sali lihé for di nan kas i a risibí apoyo di alkaldia dje siudat.
Den último añanan Brasil a sufri diferente tragedia ku tin di aber ku situashonnan di klima ekstremo, for di inundashon te ku sekuranan i kalor intenso. Den 2024 e pais a konosé hopi inundashon den parti zùit, kualnan a laga den kareda di 200 morto i 2 mion habitante afektá.
