PORT-AU-PRINCE (AFP).- Un grupo di prezu a skapa for di prizòn nashonal di Port-Au-Prince, despues di un asalto di bandanan armá i meimei di un ola di disturbio ku a bin ta sakudí e pais pa hopi dia kaba, segun embahada di Fransia i media lokal.
“Djasabra anochi, un grupo di delinkuente a hasi uso di forsa pa drenta e prizòn nashonal i a permití pa un kantidat no konosí di detenido por a hui”, segun embahada di Fransia na e kapital haitiano a duna di konosé den un komunikado di AFP. A menshoná un kantidat di por lo ménos diesdos morto.
E sindikato di polis nashonal di Haiti a hasi un yamada riba agentenan polisial i militarnan ku tin outo, arma i munishon pa nan bai e prizòn pa reforsá e seguridat. Entre esnan ku a skapa tin “miembronan importante di bandanan hopi poderoso”, segun Gazette d’Haiti.
Delinkuentenan komun, hefenan di bandanan i tambe akusadonan pa e asesinato den 2021 dje presidente Jovel Moise tabata den e prizòn, ubiká na algun blòk for di e Palasio Nashonal. For di djaweps e asaltantenan tabata spia ku ‘drones’ alrededor dje prizòn.
For di djaweps Port-Au-Prince a konosé vários atake violento di gèngnan ku ta bisa di ke e renunsia dje promé minister Ariel Henry, kende no ta na e kapital.
E gèngnan, agrupá bou dje lema “Biba Huntu”, ta realisá atakenan kordiná na e kapital kontra di lugánan stratégiko manera prizòn, e aeropuerto internashonal i vários edifisio polisial.
For di despues ku e disturbionan a start djaweps último, sigur kuater polis a muri i desena di persona a resultá heridá den e pais ku ta den un krísis polítiko, tambe krísis di seguridat i humanitario.
