Solamente dak di outo por mira riba e foto, despues ku lodo a tapa e vehíkulonan den zùitwèst di Port-au-Prince.
SANTIAGO DE CUBA (AFP).- Melissa, e orkan atlántiko mas pió den kasi un siglo, ayera tabata dirigí su mes pa Bermudas despues di a gòlpia Cuba i Jamaica den su paso den Karibe, den kua el provoká por lo ménos 30 morto, kasi tur na Haiti.
Wowo di Melissa ayera tardi Tabata na 1.000 km for di Bermudas, kaminda ta antisipá ku e orkan lo debilitá pa kategoria 1.
Cuba djárason a sufri e furia di Melissa, ku a provoká “dañonan kuantioso”, segun e presidente dje isla, Miguel Diaz-Canel.
E tormenta a afektá parti ost dje pais, ku ta pasa den un di su pió krísisnan ekonómiko. Abitantenan di e provinsianan Santiago de Cuba, Holguín i Guantánamo a mira kon kayanan i kasnan a keda kubrí pa awa.
Apénas e peliger a pasa, ku bisiñanan dje di dos siudat mas importante dje isla ku 500.000 abitante, a subi kaya ku machete den man pa kap matanan grandi ku a kai riba kaya. Outoridatnan dje isla a informá di sigur 735.000 persona ku a keda evakuá, spesialmente den e provinsianan di Santiago de Cuba, Holguin i Guantánamo.
E potensial di Melissa a superá algun orkan manera Katrina, ku a bati e siudat di New Orleans den 2005.
Na Jamaica, e orkan a yega djamars ku bientu di 300 km pa ora, loke a hasi di dje esun mas fuerte pa yega tera den 90 aña.
E promé minister di Jamaica, Andrew Holness, a deklará e pais komo “zona di desaster” Outoridatnan a hasi apelashon riba e komunidat pa mas tantu posibel keda kas pa motibu dje riesgo di inundashon i tera ku ta los. E devastashon provoká pa Melissa na Jamaica a alkansá “nivelnan nunka bisto” riba e isla, segun un funshonario di Nashonnan Uni.
Reino Uni a anunsiá di lo pone na disposishon buelonan pa siudadanonan britániko por bandoná e isla.
Sientífikonan ta bisa ke kambio di klima kousá pa ser humano ta loke ta intensifiká tormentanan grandi i esakinan awor ta oumentá ku frekuensia.
Edifisionan distruí na Black River, Jamaica, despues ku orkan kategoria 5 a pasa riba e isla. Na Jamaica kantidat grandi di edifisio komo tambe vehíkulonan a sufri dañonan inmenso.
