WILLEMSTAD.- Fundashon JAG ayera tardi a presentá un rueda di prensa kaminda nan a duna detaye di nan evaluashon di Karnaval 2018 i a hasi entrega di nan relato finansiero na representante di sektor di Kultura i Deporte.
Sr. Juni Aniceta, presidente di Fundashon JAG a kuminsá pa gradisí spònsernan i prensa pa nan sosten duna na e fundashon.

Evaluashon

E evaluashon ku Fundashon JAG a hasi ta indiká ku ‘Carnival Village’ mester keda eksistí. E úniko punto di atenshon ta e echo ku pa por mantené e ‘Carnival Village’ durante di e temporada tin gastunan haltu mará na esaki. Mester trata na yega na un rebaho di gastunan. Fundashon JAG tin e intenshon pa aserká skolnan sekundario pa dje forma ei logra na atraé mas partisipante na elekshon di Rei i Reina Tiner.
E pensamentu di sr. Stanley Ignacio pa organisá e Elekshon Hubenil di Reina, Prens i Pancho bou di dak a bira un realidat e aña aki na momentu ku e elekshon a keda organisá den ‘foodcourt’ na Sambil i tabata un éksito rotundo. Partnernan dje aña aki ya a komprometé nan mes pa otro aña bolbe sostené e evento i pa esaki un biaha mas ta grátis.
Tumba Hubenil e aña aki a logra di atraé hopi hende. E meta pa otro aña ta pa elevá e nivel dje festival i elevá tur elekshon pa Karnaval di Kòrsou.

Karnaval di Bándabou

Sra. Lisette Jansen di Fundashon Karnaval di Bándabou tabata masha kontentu pa e manera ku nan di FKBB a traha huntu ku Fundashon JAG pa organisá Karnaval 2018. ‘Tur eksperensia a logra pa huntu kontribuí pa eventonan a kana bon’, asina Lisette a indiká. Apart dje trabounan relashoná ku Karnaval di Bándabou, Lisette tabata e persona enkargá ku petishon di pèrmit pa eventonan di Karnaval tantu pa FKBB komo JAG. E komunikashon entre organisadónan i diferente dje instansianan gubernamental tabata hopi bon i esaki a kontribuí tambe na un bon relashon entre e ‘stakeholders’ di Karnaval.

LAGA UN KOMENTARIO

Please enter your comment!
Please enter your name here