WASHINGTON, AP.- Kas Blanku no a deskartá un siere mas di gobièrnu federal, miéntras legisladornan ta sigui ku e negosiashon di fondo pa e muraya ku presidente Trump kier na frontera ku México.
Den un presentashon na NBC i Fox News djadumingu, e hefe di despacho interino di Kas Blanku Mick Mulvaney a bisa ku “pa nada” no por deskartá e posibilidat pa gobièrnu bolbe sera djabièrnè si no logra un akuerdo pa e muraya.
Trump a pidi 5.700 mion dòler, un sifra rechasá pa demókratanan ku ta kontrolá Kámara di Representante.
Mulvaney a bisa ku Trump ta dispuesto pa eksplorá fuentenan alternativo di finansiamentu.
“E opshon pa un siere no por wòrdu eliminá i no por eliminá e opshon di 5.700 mion”, segun indikashon di Mulvaney na NBC.
Mulvaney a realisá un reunion ku un grupo di legislador di e dos partidonan den un reunion na Camp David djaweps. Ounke e dos partinan tabata serka di yega na un akuerdo fin di siman, tin algun desakuerdo signifikativo.
Kas Blanku i e republikanonan kier subi e suma di 2.000 mion dòler pa e muraya. E demókratanan a bisa ku lo mantené esaki bou di 2.000 mion, ku algun bisando ku nan lo sostené e plan ku kisas mitar. Ademas, e demókratanan ta poniendo preshon pa redusí e kantidat di inmigrantenan kapturá ku a wòrdu detené pa Servisio di Kontròl di Inmigrashon i Duana. E republikanonan ta resistí.
“Mi no ta kere nos ta bai logra yega na un akuerdo”, asina senador republikano Richard Shelby a bisa djadumingu na Fox.
