PALM, BEACH, FLORIDA, MERKA, AP.- Un asesor haltu di Kas Blanku a renobá su apoyo pa e dekreto di inmigrashon di presidente Donald Trump i a elogiá e oumento di deportashon.
Kas Blanku ta sigui buska opshon despues di sufri un derota hudisial siman pasa, na momentu ku un hues a suspendé e dekreto di Trump pa kanselá e programa di refugiado di Merka i prohibí siudadanonan di shete pais mayoria musulman di drenta Merka.
Stephen Miller, asesor prinsipal polítiko di Trump, i un di e arkitektonan di e dekreto, a insistí durante vários entrevista djadumingu ku e presidente tin outoridat ehekutivo na momentu ku ta trata di prohibí entrada di estranheronan ku ta wòrdu konsiderá komo un riesgo pa e pais.
El a bisa ku Trump “lo hasi tur loke ta posibel, segun lei, pa mantené e pais aki safe” i a kritiká e huesnan ku entremeté den e kaso aki.
Pa loke ta e próksimo pasonan di e gobièrnu federal, Miller a bisa ku “tur opshon ta riba mesa ainda”, entre nan un apelashon den Korte Supremo.
