WASHINGTON, MERKA, AFP.- Presidente merikano Joe Biden a anunsiá djamars ku a sera un akuerdo ku un grupo senador pa rekonstruí e nashon su infrastruktura, habriendo porta pa haña finansiashon pa kareteranan, brùgnan, puertonan i tambe broadband despues di vários dékada.

E Senadornan a reuní “pa sea un akuerdo ku lo krea miónes di trabou den Merka, modernisá nos infrastruktura merikano i kompetí ku sobrá parti di mundu”, asina Biden a indiká.

E presidente a topa ku senadornan mas trempan den dia pa resumí e negosiashonnan tenso di último simannan, kaminda e demókratanan i republikanonan no tabata di akuerdo tokante e montante pa finansiashon di e proyekto.

Pero Biden a bisa ku e logro ta un ehèmpel tokante kon Washington por yega na un konsenso riba proyektonan ku ta rekerí sumanan haltu di invershon si ámbos partido traha huntu. El a bisa ku e akuerdo aki a “kibra e eis ku hopi biaha a mantené nos di fris i prevení nos di resolvé problemanan di bèrdat ku e pueblo merikano ta enfrentá”.

E senadornan a akordá riba un pakete di 973 miar durante sinku aña. Biden a enfatisá ku e plan masivo aki, kual ta e invershon di mas grandi den brùgnan i transporte públiko merikano, ta konforme su rekerimentu pa no subi impuesto pa niun hende ku ta gana bou di 400.000 dòler pa aña.

 

LAGA UN KOMENTARIO

Please enter your comment!
Please enter your name here