Kas pegá ku Kònsùl Merikano
WILLEMSTAD,- Polis di Punda huntu ku brantwer di Mundu Nobo i Steenrijk mester a bai ku urgensia pa atendé un kaso di kandela. Ta trata di un kas den Gorsiraweg, porsierto ta e kas pegá ku Kònsùl Merikano.
Informashon ku EXTRA a risibí na e sitio ta indiká ku aparentemente un persona lo a lubidá un heru di strika sendé riba kama i esei a kousa un kandela ku a kima parti di e kas. Un hende hòmber a resultá herida, ya ku el a risibí kemadura. A transportá e persona aki pa hospital pa tratamentu.
Komo ku ta trata di e kas pegá ku Kònsùl Merikano por a tuma nota ku no a permití niun hende drenta na ofisina di e kònsùl. Tin vários hende ku ta bai e ofisina menshoná pa atendé nan asuntunan di visa etc. Mas detaye den edishon di EXTRA.
++UPDATED. Polis di Korsou awe merdia a manda e siguiente komunikado di prensa: Djárason 24 di yüni 2026, alrededor di 08:34‘or, sentral di polis a risibí yamada ku un kas den John B. Gorsiraweg tabata na kandela. Na yegada di unidat di polis na e sitio, el a konstatá ku parti di e interior di e kas tabata na kandela. A pidi asistensia di unidat di brantwer pa yega rápidamente pa paga e kandela. Un habitante ku durante di e kandela a bai saka un kolchón pa minimalisá e daño di kandela, a risibí kemadura. Ku ambulans el a keda transportá pa Sala di Emergensia di C.M.C. pa tratamentu médiko. E kas a kima parsialmente i investigashon den e kaso aki ta kontinuá.++
