HERUSALEM, AP.- Fiskal israelí a akusá Sara Netanyahu, kasá di e promé minister britániko Benjamin Netanyahu, pa un serie di delito ku ta inkluí froude i abusu di konfiansa.
Netanyahu ta akusá di malversashon di fondo públiko dor di ordená sentenar di kuminda pa e residensia ofisial di e promé minister, balorá na mas di 100.000 dòler. E Ministerio di Hustisia di Israel a indiká den un komunikado ku no tabatin un kòki den e kas aki.
Un eks supdirektor di e residensia di e promé minister ta akusá den e kaso.
Ounke e promé minister no ta direktamente impliká den e kaso, e denunsia kontra Sara Netanyahu ta menasá di krea un situashon bergonsoso pa e veterano gobernante i ta pone lus riba su propio problemanan legal.
Netanyahu tabata disfrutando di vários luna di éksito polítiko, inkluyendo e retirada di Merka di e akuerdo nuklear ku Iran i su traslado pa embahada di Herusalèm. Esaki a desviá e atenshon di kargonan di korupshon kontra e premier.
Desde vários aña Sara Netanyahu ta enfrentá akusashonnan di komportashon abusivo di biba un bida ekstrabagante i ta deskonektá ku realidat di e pais.
Den e demanda djaweps, e Ministerio di Hustisia a bisa ku sara Netanyahu ta akusá pa malversashon, froude i violashon di e konfiansa públiko debí ku el a gasta mas di 100.000 dòler na senanan privá den e residensia ofisial.
Si e wòrdu deklará kulpabel, e por wòrdu sentensiá na sigur sinku aña di prizòn, ounke esaki ta improbabel.
No tabatin komentario mesora di su ofisina.
