Presidente di Spaña, Pedro Sanchez huntu ku su kasá Begona Gomez, ayera durante di un bishita ku nan a hasi na un universidat na Beijin, China.
MADRID, Spaña (AFP).- E kasá di presidente di gobièrnu spañó, Pedro Sanchez ku ta Begona Gomez, a keda akusá formalmente di korupshon despues di un investigashon di vários aña, segun un resolushon hudisial publiká ayera. Esaki ta un dje kasonan di korupshon mas notabel di famia dje lider sosialista i su èks-aliadonan.
E kaso ta relashoná ku kreashon di un katédra di Universidad Complutense di Madrid ku a keda dirigí pa e.o. Begona Gomez i relashoná ku e supuesto uso di rekursonan públiko i kontaktonan personal pa promové interesnan privá. E wes, Juan Carlos Peinado, a akusá Gomez pa malversashon, tráfiko di influensia, korupshon i aprobashon inkorekto di fondonan, segun un desishon fechá 11 di aprel.
E katédra a sirbi komo un medio di desaroyo profeshonal privá pa e persona ku a keda investigá”, segun wes. Awor ta keda na tribunalnan pa disidí si Gomez (55) tin ku bai korte. Gomez, kende ta na China huntu ku su kasá durante di un bishita ofisial, a nenga kualke iregularidat.
Sanchez a referí na e akusashonnan kontra di su kasá komo un intento di derecha pa tumba su gobièrnu. Partidonan di oposishon ya a pidi su retiro. E ruman dje presidente di gobièrnu, David Sanchez, tambe a keda akusá den un otro investigashon relashoná ku su kontratashon di parti di un gobièrnu regional. E èks-kolaboradó di Sanchez i èks-ministe rdi transporte, José Luis Abalos, a keda husgá e luna’ki pa supuesto komishonnan ilegal relashoná ku kontraktnan públiko.
