E komUnídat haitiano kasi diariamente ta riba kaya den akshonnan di protesta pa motibu di skarsedat di kuminda i kombustibel.
PORT-AU-PRINCE (AFP).- Di akuerdo ku e agensia di migrashon di Nashonnan Uní, den kareda di 1.5 mion haitiano a bandoná nan kas i ta riba kaya pa motibu dje violensia di gèngnan. Nashonnan Uní tin miedu ku aki un par di luna nan no por sigui yuda e pais.
Haiti, e pais mas pober di Amérika, ku un poblashon di 12 mion habitante, pa hopi aña kaba ta den e problema serio aki, ku kantidat grandi di asesinato, violashon, sakeonan i sekuestronan di parti di gèngnan. Organisashon Internashonal di Migrashon (OIM) i Nashonnan Uní a konstatá ku e krísis humanitario den e pais a bira pió. Atakenan armá ya no ta keda limitá na puntonan krítiko sino ku awor nan ta gòlpia tambe e zonanan konsiderá komo lugánan di refugio.
“Kasi 1.5 mion persona a bandoná nan kas”, segun Gregoire Goodstein, hefe di mishon di OIM na Haiti, den un konferensia di prensa na Ginebra. “Nos no ta bahando e violensia, e ta ekspandiendo”, segun el a agregá. E kantidat di hende ku a hui for di nan kas pa motibu di violensia awor ta representá 12% di e poblashon. Mas ku mitar ta mucha i hende muhé.
Den luna di mei e agensia a informá ku un eksploshon di violensia den e zona di Cité Soleil a pone 18.000 hende na kareda den djis algun dia. “Loke nos ta mira awor aki ta e violensia armá, desplasamentu masivo, inseguridat di kuminda, regreso fòrsá na gran eskala, peligernan di klima komo tambe institushonnan bou di preshon na tur nivel, kada un ta hasi ku e situashon ta bira pió”, segun Goodstein.
Ta bini aserka ku mas ku 270.000 haitiano den estranhero a keda obligá na regresá e pais den 2025 i pa loke ta bai e aña ki, otro 110.000 a regresá. Den e grupo ei tin kantidat grandi di menor di edat sin nan mayornan. “Pa algun, ta promé biaha den dékada, òf te hasta den na bida, ku nan ta pone pia riba suela haitiano”, segun el a agregá.
E situashon nobo ei ku a bini aserka ta hasi mas krítiko e limitashonnan finansiero “ku awor ta menasá nos kapasidat pa sigui ku nos trabounan despues di luna di òktober”, di akuerdo ku e funshonario.
Famianan ta bibando den situashonnan realmente malu. Ta bini aserka ku di e míles di haitianonan ku ta keda deportá for di otro paisnan i ku ta yega Haiti, un kantidat grandi ta muchanan sin hende ku ta kompaña nan.
