WILLEMSTAD.-  Djabièrnè último den Laman Karibe e barku hulandes di Marina S.M. Groningen a obligá un go-fast pa stòp. Den esaki e barku a bolbe interseptá un lote grandi di kokaina. Esaki tabata pa Groningen e di dos lote di droga den tres dia ku a keda konfiská.

Un di e avionnan marítimo di patruya di Wardakosta den Region Karibe, e Dash-8, a deskubrí e go-fast. Riba esaki S.M. Groningen a keda avisá. Despues el a drenta akshon ku su dos nave rápido FRISC.  Na bordo tabatin un ekipo kombiná di Wardakosta merikano i Kuerpo di Marina. Nan a detené esnan ku tabata abordo di e go-fast i a interseptá e droga. E sospechosonan ademas di karga ilegal mas despues a keda entregá na Wardakosta merikano pa persiguí nan na Merka.

Ta kalkulá ku den e akshon aki tabatin 465 kilo di droga envolví.

S.M. Groningen for di yüni 2020 ta e barku di patruyahe den Region Karibe i ta aktivo den e region, kombinando operashonnan kontra droga ku sosten di Wardakosta den Region Karibe. Siman pasá Groningen a interseptá kaba 455 kilo di kokaina.

LAGA UN KOMENTARIO

Please enter your comment!
Please enter your name here