Kasi 200 mil florin hòrtá den asalto di ATM di ACU

...Di e forma aki e ATM a keda ora ku nan a bul’é...

WILLEMSTAD .- Den e asalto riba e mashin di ATM di ACU a bai ku den kareda di 200 mil florin, asina fuentenan bon na altura a bisa EXTRA. E entidat lo kita su ATM-nan rònt Kòrsou konsiderando e peligernan serio ku tin awor aki. Pa sosionan sigur esei ta un mal notisia.

Den último dianan diferente ATM a bira víktima di asaltantenan. Dia 31 di desèmber tabata un di MCB na Bándabou, despues dia 5 di yanüari a asaltá e ATM di ACU na Santa Rosa i ayera mardugá a purba kibra un di Girobank na Corrieweg, intento ku a frakasá. Den e kaso ei a hasi diferente detenshon ku EXTRA ta relatá den su edishon di awe.

Pa loke ta trata e kaso di ACU, imágennan di video a demostrá ku a asaltantenan tabata bon prepará. Loke ta remarkabel ta ku nan a  hasi uso di un persona kurpa chikí pa penetrá te paden den e sistema. Pero huma di protekshon a kuminsá sali for di e ATM loke a pone ku e asaltantenan a pèrdè hopi tempu den nan intento i e alarma a zona. Polis a yega rápidamente na e sitio i nan a move lagando parti di e botin atras. Na e sitio tabatin diferente plaka di papel tirá abou. No opstante esei e asaltantenan a logra bai ku den kareda di 198 mil florin, segun EXTRA tin entendí.

E imágennan ta demostrá tambe ku aparentemente e asaltonan aki ta produkto di tantu hende lokal kombiná ku loke ta parse estranheronan. Riba un di e grabashonnan por mira un persona delegá koló kla ku ta esun ku a penetrá te paden konsiderando su tamaño. Huma ku a sali na e sitio a pone ku e asaltantenan no por a traha den e kantidat di minüt disponibel pa saka tur lachi di plaka pa asina nan bandoná e sitio promé ku outoridatnan yega.

EXTRA a haña mas detaye di e manera ku ACU ta sigurá su mashinnan pero konsiderando ku ta trata di un kaso delikado a pidi nos pa no duna detaye di e protekshon adishonal ku e entidat ta usa pa su mashinnan. ACU ta sigurá pa loke ta trata su mashinnan.

Ekspertonan a bisa EXTRA ku den pasado tabata usa un tipo di fèrf ku ta akumulá riba tur plaka di papel ku asaltantenan bai kuné. Pero últimamente a bira mas fásil pa deshasí di e fèrf speshal aki di manera ku awor aki ta usando otro sistemanan. “Pero kontra forsa brutu, nada ta yuda”, asina un di e ekspertonan a bisa papiando di e eksploshon ku a tene na e sitio pa bula e lugá.  E investigashon den e kaso aki ta sigui.

Outoridatnan ta den estado di alerta pa e eventualidat di mas di e kasonan aki. Un preokupashon ta sigui e kantidat di vürwèrk profeshonal ku a hòrtá fin di aña pasá. Tin e sospecho ku lo usa e vürwèrk aki pa kualke robo grandi.

Un aspekto ku ta bon pa menshoná ta ku e robonan di ATM finalmente lo pone ku e prima di seguro pa entidatnan finansiero lo subi. Ta un regla internashonal di seguro ku mas riesgo ta nifiká mas prima. Finalmente ta e konsumidó mes lo mester bai paga tantu pa e impakto riba e infrastruktura ku den e kaso di ACU ta kuantioso pero tambe pa sigurá e sumanan ku tin den mashinnan ATM.

 

SHARE

LEAVE A REPLY