GINEBRA (AFP).- Den kareda di 800 persona a muri den Gaza for di 27 di mei na momento ku nan tabata buskando yudansa. E mayoria a pèrdè nan bida den serkania di puestonan di e fundashon di derechinan humano, apoyá pa Merka ku Israel.
Fundashon Humanitario pa Gaza (GHF) dia 26 di mei a kuminsá distribuí kahanan ku produktonan di alimento, esaki despues di un blokeo di mas ku dos luna imponé pa Israel i esei apesar di tur atvertensia ku kantidat grandi di hende ta kore riesgo di muri di hamber.
Entre 27 di mei, fecha ku a start e operashonnan di e Fundashon Humanitario pa Gaza, i 7 di yüli, “nos a registrá 798 morto, di kua 615 den serkania dje instalashonnan di GHF”, segun un bosero di ‘Alto Komisionado’ di Nashonnan Uní pa Derechinan Humano, Ravina Shamdasa.
“Nos ta papiando di kasi 800 persona ku nan a mata na momento ku esakinan tabata buskando yudansa. E mayoria dje heridanan tabata ku bala”, segun el a splika.
Nashonnan Uní i e prinsipal organisashonnan di yudansa a nenga di traha ku FHG, bisando ku esaki tabata sirbi e metanan militar israelí i tabata violá e prinsipionan humanitario básiko.
E distribushon di yudansa di GHF a mustra esenanan kaótiko i ehérsito israelí tabata tira vários biaha pa purba na baha e fluho di palestinonan, desesperá pa haña yudansa.
E fundashon, ku a kontratá personanan armá pa mantené seguridat di su sentronan, a nenga ku insidentenan a tuma lugá hopi serka di su kuater sitionan di distribushon.
