Un tim di búskeda i reskate
CARACAS, VENEZUELA, AFP.- E kantidat di mortonan ku a registrá despues di dos temblor potente na Venezuela na komienso di e siman akí a laga 920 morto te ku ayera. Asina e presidente di Asamblea Nashonal, Jorge Rodriguez a informá.
E pais suramerikano ainda ta rekuperando di e dos temblornan di magnitut 7,2 i 7,5 ku a sakudí parti nort di e pais djárason. E di dos temblor a keda registrá apénas 1 minüt despues di e promé.
Den un mensahe na televishon, Rodriguez a aktualisá e kantidat di víktimanan. El a anunsiá tambe ku lo desplegá militarnan den un di e estadonan di mas afektá pa e tragedia: La Guaira.
Mas di 50.000 persona ainda ta pèrdí despues di e desaster, segun indikashon di e hefe di yudansa humanitario di Nashonnan Uní, Tom Fletcher.
Famianan ta buskando nan sernan kerí desesperadamente bou di ruina di edifisionan. Algun tabata move restunan di edifisionan ku nan propio man.
Den un edifisio ku a basha ‘den kompletamente na La Guaira, AFP a mira trahadónan usando nan mannan pa buska víktima. Nan a pidi pa “silensio apsoluto” pa asina purba skucha gritu di posibel sobrebibientenan.
Paisnan rònt mundu a primintí yudansa humanitario i sosten den labornan di reskate pa Venezuela.
Boluntarionan purbando di lanta un pida betòn pa buska sobrebibiente
