WILLEMSTAD – Awe den oranan di mardugá polis a risibí notifikashon di un posibel kaso di asesinato na Soto den un di e hanchinan smal patras di e Misa di e bario aki (Kaminda Serapio Pinedo). Un habitante di e área lo a nota un hòmber drumi abou ku no tabata duna señal di bida. Tambe el a nota ku e hòmber tabatin diferente perforashon di bala na su kurpa. Na yegada di polis ya no por a hasi nada mas pa e víktima i a yama dokter di polis pa bin konstatá morto. Famianan di e víktima tabata na e sitio i tabata basta alterá. Sigur na e momentu ku un di a famianan a bai identifiká nan ser kerí ora ku polis a permití esaki. Polis a tene a área kompletamente sera pa e diferente departamento nan di polis por hasi nan investigashon.
Awe mèrdia polis a konfirmá ku e víktima ta Shurvey Chanél Delando nasé na Kòrsou dia 2 sèptèmber 1990.
Riba òrdu di fiskal di Ministerio Públiko a konfiská e kurpa sin bida pa mas investigashon.
Polis ta supliká kualke persona ku por a mira òf tin informashon di e kaso ariba menshoná pa pasa e informashon aki pa polis.
Por hasi uso di e numbernan di telefòn 917 òf e number anónimo 108.
(Foto FB)
 patras di Misa di Soto awe mardugá){kind=link}