WILLEMSTAD – Awe den oranan tempran di mardugá sentral di polis a risibí notifikashon ku lo tin un kaso di tiroteo den área di Bapor Kibra. Ku urgensia polis a bai direkshon aki i a resultá ku riba e sitio di stashoná outo na Mambo lo tin un hòmber herida. Mesora polis a tuma nota di e situashon di e víktima i a pidi asistensia tambe di ambulans. Na yegada di e personal di ambulans ya no por a hasi nada mas pa e víktima. Dòkter di polis mester a akudí na e sitio pa konstatá morto ofisialmente. Polis tabatin henter e área sera pa por hasi nan investigashon. Tantu TFO komo reshèrshi mester a akudí tambe na e sitio. No tin muchu informashon ainda di e kaso aki pero por bisa ku polis a bin topa un kantidat grandi di huls benta abou i ku e víktima tabata benta abou banda di un Chevrolet Spark kolo kora.
Informashon adishonal ku EXTRA a risibí ta indiká ku e víktima, un persona lokal tabatin vários herida di bala. E tim di TFO a konfiská mas ku 20 huls na e sitio, a konfiská un arma di kandela i tambe e vehíkulo mirando ku e tabata tin perforashon di bala. Sigun informashon ku nos a kompilá na e sitio, e hòmber víktima tabata saliendo for di mambo i un persona a sorprendé e hòmber aki I kuminsá los tirunan dirigí riba dje.
Despues di su akto el a drenta den un vehíkulo kolo skur i hui bai for di e sitio.
Polisnan lo kontinuá ku mas investigashon den e kaso.
