LOS ANGELES, MERKA, AFP.- Bill Cosby mester enfrentá komienso di un proseso sivil na California djaluna, pa asalto seksual kontra un adolesente kasi sinku dékada pasá.
Judy Huth a bisa ku Cosby a atake den mansion di Playboy den añanan 1970, temporada e tabatin 15 aña.
Huth a bisa ku komo konsekuensia di e episodio aki el a sufri “dañonan sikológiko i angustia mental”. El a indiká ku el a konosé Cosby durante grabamentu di un pelíkula i ku algun dia despues el a wòrdu invitá na Cosby su klup di tènis.
Segun Huth, akinan Cosby a dun’e alkohòl i hib’e na e mansion di Playboy, kaminda el a wòrdu fòrsa pa tene relashon seksual kuné.
E aktor ta ninga e akusashonnan ku ta kuminsá djaluna na Santa Monica.
Vários hende muhé ta afirmá ku nan tabata víktima di atakenan seksual di Cosby.
E komediante a wòrdu kondena pa droga i agredí un muhé seksualmente 17 aña pasa. Pero el a sali for di prizòn dor ku korte supremo di estado a disidí ku su huisio no tabata unu hustu.
E desishon di korte tabata debí na elementonan tékniko, i no un eksonerashon.
