BUENOS AIRES (AFP).- Un tribunal Argentino a fiha pa 17 di mart di 2026 e komienso di e kaso nobo riba morto di Diego Maradona, despues dje suspenshon bochornoso dje promé proseso den mei último, segun un resolushon hudisial kompartí na AFP. E promé kaso penal na San Isidro, den nort di Buenos Aires, a keda anulá despues ku un dje wesnan di e kaso a keda poné un banda pa motibu di a tuma parti den un dokumental no outorisá dje proseso.
E skandal a konkluí ku renunsia dje otro dos wesnan ku tabata den e kaso. Den su resolushon di ayera, e tribunal di San Isidro a konvoká e partidonan pa un oudiensia preliminar dia 13 di novèmber “pa trata e atmishon di pruebanan ofresé”.
Maradona a fayesé dia 25 di novèmber di 2020 pa un problema di pulmon miéntras ku e tabata interná na kas kaminda e tabata rekuperá di un operashon. Ocho miembro dje ekipo médiko dje astro di futbòl ta keda akusá di homisidio, afirmando ku nan tabata konsiente ku e situashon na kas lo por a okashoná morto dje pashènt.
E defensa di un dje akusadonan, e sikiater Laura Cosachov, a pidi pa anulá e kaso pa motibu ku no por husga un persona dos biaha pa e mesun delito. E tres wesnan nobo dje kaso a rechasá esaki.
Den e promé kaso tabata buska pa determiná e responsabilidat dje ekipo médiko pa morto di Maradona Durante dje proseso a kuestioná e echo di atendé e èks-futbolista na su kas, despues di un operashon hopi grandi dia 3 di novèmber di 2020.
Vários dòkter a deklará na inisio dje proseso ku e kamber den kua Maradona a muri “tabata hopi shushi, hopi for di òrdu” pa un persona resien operá, ademas di a konstatá ousensia di algun ekipo médiko.
