NEW YORK, AP.- E kaso di Anthony Weiner ta dominando elekshon merikano ya ku mensahenan di su kòmpiuter a keda sitá pa FBI komo e motibu dikon e ta keda investigá pa práktikanan sibernetiko di e kandidato demókrata Hillary Clinton.
Weiner ta kasá ku Huma Abedin un kolaboradó estrecho di Clinton. Sinembargo nan ta separá aktualmente debí na e skandalnan tras di otro ku a keda deskubrí den interkambionan sensual di mensahenan di teksto ku otro muhé.
E investigashon federal riba e mensahenan di Weiner ta e kaso di relashon ku FBI ta menshoná ku nan ta investigando pa práktikanan di Clinton di usa un sistema privá di koreo elektróniko tempu e tabata sekretario di estado.
E direktor di FBI James Comey a bisa den kongreso ku e mensahenan por ta pertinente pa nan investigashon, riba e sistema privá di Clinton. Esei a pone Weiner atrobe den lus públiko.
Weiner mester a renunsiá na kongreso na 2011 ora pa ekibokashon el a pone riba Twitter un imágen di e mes sin paña bistí. E mensahe tabata dirigí pa un muhé ku no ta su kasá. Abedin a sigui kasá kuné, i dos aña despues el a postulá su mes pa alkalde di New York.
Un temporada e tabata asta na kabes di un enkuesta, te ora a sali pruebanan ku e tabata sigui manda mensahenan seksual via teksto.
Ora ku el a keda deskubrí atrobe pa e práktikanan aki aña pasá, Abedin a bai lag’é, Outoridatnan federal a kuminsá un investigashon di posibilidat di ku e ta mandando mensahenan pornográfiko pa un mucha di 15 aña. E eks kongresista no a kontestá e petishon di komentario riba e mensahenan ku e tabata manda.
