WILLEMSTAD.- Kasonan di importashon di COVID-19 ta sigui oumentá riba nos isla. For di dos siman pasa por a mira oumentonan di riba 6 kaso pa dia. Di djasabra 10 di yüli pa ayera djaluna 12 di yüli tabatin hopi kaso di importashon di corona vírus atrobe riba nos isla.
Den tres dia tin 18 kaso importá i 7 ku supuestamente lo ta lokal, pasombra den e splikashon dje sifranan no ta bisa ku nan ta lokal.
Djasabra 10 yüli tabatin 9 kaso di kual 6 tabata importá. E kantidat di kaso ta for di 1651 resultado di tèst.
Djadumingu 11 di yüli for di 1702 resultado di tèst, tabatin 10 kaso nobo di kual 7 ta importá. Atrobe no ta bisa kiko e tres kasonan ta.
Ayera djaluna 12 di yüli tabatin 6 kaso nobo di corona vírus for di 1362 resultado di tèst. Den e kaso aki, 5 kaso ta importá. E tim no ta bisa nada di esun ku ta keda “zweef”.
E kantidat di hendenan ku a Sali for di isolashon den e tres dianan tambe ta hopi abou ku ta 7.
Dor di e kantidat di kasonan importá ayera e kasonan aktivo a yega na 48. Pues kasonan aktivo tambe ta subiendo.
Algu positivo ta ku den hospital no tin ningun hende ta risibí kuido intensivo, miéntras tin 4 persona ketu bai hospitalisá.
