SAN JUAN, AP.- E kantidat di kaso di e vírus di Zika na Puerto Rico ta oumentando i outoridatnan ta evaluando posibilidat pa spùit insektisida desde aire pa kombatí esaki. Asina e sekretaria di salú a informá djabièrnè.
Ana Rius a deklará ku a registrá 714 kaso nobo di Zika siman pasá, pa un total di 3.101 kaso, entre nan tin 476 muhé na estado i 17 persona ku ta sufri di e síndrome di Guillain-Barré, un enfermedat ku ta ataká e sistema nèrvioso i ku a keda vinkulá ku Zika. E vírus ta kousa mikrosefalia tambe, un defekto di nasementu kaminda beibinan ta nase ku kabes apnormalmente chikitu.
Puerto Rico a reportá su promé kaso di mikrosefalia. Ademas, un persona a fayesé debí na e vírus.
E gobernador di e isla ainda no a tuma un desishon pa ku e insektisidanan. Tabatin vários protesta kontra e medida pa temor ku e sustansianan no ta bon pa salú.